మెగాస్టార్‌ చిరంజీవి కథానాయకుడిగా రూపుదిద్దుకుంటోన్న 'ఖైదీ నంబర్‌ 150' చిత్రంలోని 'అమ్మడు..' అనే పాటను రేపు సాయంత్రం విడుదల చేస్తున్నారు. చిత్ర బృందం సోషల్‌మీడియా ద్వారా శనివారం ఈ విషయాన్ని ప్రకటించింది. ఈ సందర్భంగా డ్యాన్స్‌ చేస్తున్న చిరు పోస్టర్‌ను అభిమానులతో పంచుకుంది. ఈ నెల 25న ఆడియోను మార్కెట్‌లోకి విడుదల చేయబోతున్నామని, జవనరి తొలివారంలో ప్రీ-రిలీజ్‌ వేడుకను నిర్వహిస్తున్నామని ట్వీట్‌ చేసింది. వి.వి.వినాయక్‌ దర్శకత్వం వహిస్తున్న ఈ చిత్రాన్ని కొణిదెల ప్రొడక్షన్‌ కంపెనీ పతాకంపై రామ్‌చరణ్‌ నిర్మిస్తున్నారు.

సురేఖ కొణిదెల చిత్రాన్ని సమర్పిస్తున్నారు. కాజల్‌ కథానాయికగా నటిస్తున్న ఈ చిత్రానికి దేవిశ్రీ ప్రసాద్‌ స్వరాలు సమకూరుస్తున్నారు. సంక్రాంతికి 'ఖైదీ నంబర్‌ 150' చిత్రాన్ని విడుదల చేయడానికి సన్నాహాలు చేస్తున్నారు.