ఓ చరిత్రాత్మక చిత్రాన్ని రూపొందించాలని దర్శకుడు సుందర్‌.సి ఎప్పటినుంచో అనుకుంటున్నారు. ఇన్నాళ్లకు ఆ కోరిక నెరవేరనుంది. ఆ భారీ బడ్జెట్‌ చిత్రమే 'సంఘమిత్ర'. దీన్ని శ్రీతేనాండాల్‌ ఫిలిమ్స్‌ నిర్మించడానికి ముందుకు వచ్చింది. ఈ పరిణామంతో సుందర్‌.సి ఆనందంలో మునిగితేలుతున్నారు. ఇందులో జయంరవి, ఆర్యలు కీలక పాత్రల్లో నటిస్తున్న విషయం తెలిసిందే.

ఇతర నటీనటుల ఎంపిక కొనసాగుతోంది. ఇటీవలే సినిమాకు సంబంధించిన సెట్‌ వేయడానికి హైదరాబాద్‌లోని రామోజీ ఫిలిం సిటీని చిత్రబృందం సందర్శించింది. సాధారణ చిత్రీకరణకు ముందుగానే గ్రాఫిక్స్‌ పనులను సుందర్‌. సి ఆరంభించారు.

గ్రాఫిక్స్‌కు చిత్రంలో కీలక స్థానం ఉన్నట్లు సమాచారం. ఆరు నెలలుగా అమెరికాలో ఈ పనులు జరుగుతున్నట్లు కోలీవుడ్‌ వర్గాలు చెబుతున్నాయి. తమిళం, తెలుగు, హిందీ భాషల్లో ఏకకాలంలో చిత్రీకరణ కొనసాగనుంది. ఈ చిత్రం కోసం ఏప్రిల్‌లో కళాదర్శకుడు సాబుసిరిల్‌ భారీ సెట్‌ను ఏర్పాటు చేయనున్నట్లు సమాచారం.