అమెరికా చట్టసభలకు ఎన్నికైన అయిదుగురు భారతీయ అమెరికన్లకు కీలక కమిటీల్లో స్థానం లభించింది. యూఎస్‌ కాంగ్రెస్‌లో ఒకేసారి ఇంతమంది భారతీయ అమెరికన్లకు ముఖ్యమైన బాధ్యతలు నిర్వర్తించే అవకాశం రావటం ఇదే తొలిసారి. సిలికాన్‌ వ్యాలీ నుంచి ఎన్నికైన ఆర్వో ఖన్నా.. కీలకమైన బడ్జెట్‌ కమిటీకి ఎంపికయ్యారు. సియాటిల్‌ నుంచి ప్రతినిధుల సభకు ఎన్నికైన ప్రమీలా జయపాల్‌.. న్యాయ కమిటీలో స్థానం దక్కించుకున్నారు. షికాగో పశ్చిమ, వాయువ్య శివార్లకు ప్రాతినిధ్యం వహిస్తున్న రాజా కృష్ణమూర్తి... విద్య, కార్మికశక్తి కమిటీకి ఎంపికయ్యారు. మూడు దఫాలుగా ప్రతినిధుల సభకు ఎన్నికవుతూ వస్తున్న అమి బెరా...

విదేశీ వ్యవహారాలు; సైన్స్‌-స్పేస్‌-టెక్నాలజీ కమిటీలకు తిరిగి ఎంపికయ్యారు. యూఎస్‌ సెనెట్‌కు ఎన్నికైన తొలి భారతీయ అమెరికన్‌ మహిళ.. కమలా హారిస్‌ ఏకంగా నాలుగు కమిటీల్లో ముఖ్యమైన బాధ్యతలు నిర్వర్తించనున్నారు. బడ్జెట్‌, పర్యావరణం, ప్రజాపనులు, అంతర్గత భద్రత, ప్రభుత్వ వ్యవహారాల కమిటీలతో పాటు నిఘా విభాగం ఎంపిక కమిటీలో ఆమె సభ్యురాలుగా నియమితులయ్యారు.