రాష్ట్ర రాజధానిలో ఐసిస్ పడగవిప్పుతోందా..? భాగ్యనగరంలో మరోసారి భారీ విధ్వంసానికి వ్యూహం పన్నుతోందా..? అవుననే అంటున్నారు ఎన్ఐఏ అధికారులు. హైదరాబాద్‌లో పాగా వేసేందుకు ఐసిస్ చాపకింద నీరులా వ్యూహాలు చేస్తోంది. ఈ క్రమంలోనే ఉగ్రవాది మహ్మద్ ఇర్ఫాన్ ఐసిస్ ఉగ్రవాదుల కోసం నగరంలో పలుచోట్ల క్యాంపులు నిర్వహించాడు. ఇందుకోసం సురక్షిత స్థావరాలను వెతికి ఆయా ప్రాంతాల్లో ఇళ్లు అద్దెకు తీసుకున్నాడు. అయితే ఇర్ఫాన్ కదలికలను పసిగట్టిన ఎన్ఐఏ అధికారులు మంగళవారం అతన్ని అరెస్ట్ చేశారు. అనంతరం కోర్టులో హాజరుపరుచగా.. న్యాయస్థానం ఇర్ఫాన్‌కు 7 రోజుల కస్టడీ విధించింది. కాగా, ఐసిస్ కమాండర్ మహ్మద్ ఇబ్రహీం ఎజ్దానీ సూచనల మేరకే ఇర్ఫాన్ పలు ప్రాంతాల్లో ఇళ్లు అద్దెకు తీసుకున్నట్లు ఎన్ఐఏ అధికారులు గుర్తించారు.