నటసింహం నందమూరి బాలకృష్ణ గౌతమిపుత్ర శాతకర్ణి విజయంతో మంచి ఊపు మీద ఉన్నాడు. ఇంతటి భారీ విజయాన్ని అందించిన ప్రజలకి కృతజ్ఞతలు తెలిపే పనిలో భాగంగా ఈ రోజు తన టీంతో కలిసి అమెరికాకి బయలుదేరనున్నాడు. మరోవైపు తన కుమారుడి తెరంగేట్రం పై వస్తున్న వార్తలపై ఎట్టకేలకు స్పందించాడు. తాజాగా ఓ సందర్భంలో బాలకృష్ణ మాట్లాడుతూ, ఈ ఏడాది మోక్షజ్ఞ సినీ రంగ ప్రవేశం ఉంటుందంటూ అభిమానుల్లో ఉత్సాహాన్ని రేకెత్తించాడు. తొలి చిత్రాల్లో మోక్షజ్ఞ లవర్ బాయ్ గానే కనిపిస్తాడనీ .. అయితే ఎక్కువ కాలం అదే తరహా పాత్రల్లో కనిపించడానికి తమ అభిమానులు ఒప్పుకోరని అన్నారు. ఆదిత్య999 కథ అయితేనే తనకి మోక్షజ్ఞకి సరిపోయే కథ అవుతుందని అలాగే కథల విషయంలో ఏనాడూ తన జడ్జ్మెంట్ తప్పు కాలేదని చెప్పాడు. ఇప్పటికే ఆదిత్య999కి సంబంధించి బౌండ్ స్క్రిప్ట్ సిద్ధంగా ఉందని పేర్కొన్నాడు. చివరగా ఈ ఒక్క సినిమాలోనే తన కొడుకు పక్కన నటిస్తానని ఆ తర్వాత కలిసి నటించే యోచన ప్రస్తుతానికైతే  లేదని మనసులో మాట చెప్పాడు.