మాంట్రియల్: కెనడాలోని ఓ మసీదులోకి ముగ్గురు దుండగులు భారీ ఆయుధాలతో ప్రవేశించి కాల్పులకు తెగబడ్డారు. దీంతో ఐదుగురు అక్కడికక్కడే ప్రాణాలు కోల్పోగా పలువురికి గాయాలయ్యాయి. క్యూబెక్ సిటీలో ఆదివారం సాయంత్రం మసీదులో ప్రార్థనలు జరుగుతుండగా ఈ దారుణం చోటు చేసుకున్నట్టు ప్రత్యక్ష సాక్షులు పేర్కొన్నారు. దాడికి పాల్పడినట్టు భావిస్తున్న ఇద్దరు వ్యక్తులను అదుపులోకి తీసుకున్నట్టు పోలీసులు వెల్లడించారు. కాల్పులు జరుగిన సమయంలో క్యూబెక్ సిటీ ఇస్లామిక్ కల్చరల్ సెంటర్‌లో మొత్తం 40 మంది ఉన్నట్టు సమాచారం. కాగా ఇదే మసీదు వద్ద గతేడాది జూన్‌లో కొందరు దుండగులు పంది తలను ఓ కవర్‌లో ప్యాక్ చేసిపెట్టడంతో కలకలం రేగింది.
ముస్లిం మహిళలు సంప్రదాయంగా ధరించే నిఖాబ్‌పై నిషేధం విధించాలంటూ గత కొన్నేళ్లుగా రాజకీయ చర్చలు జరుగుతున్న నేపథ్యంలోనే ఇక్కడ తరచూ ముస్లిం వ్యతిరేక సంఘటనలు చోటుచేసుకుంటుండడం గమనార్హం.