పోలీస్‌ ఆఫీసర్‌ కావాలనే ప్రయత్నించే ఓ యువకుని కథతో రూపుదిద్దుకొంటున్న చిత్రం 'నక్షత్రం'. కృష్ణవంశీ దర్శకత్వంలో రూపుదిద్దుకొంటున్న ఈ చిత్రం ఒక పాట మినహా పూర్తయింది. సందీప్‌కిషన్ హీరోగా నటిస్తున్నారు. ఓ ప్రముఖ కథానాయికపై ఆ పాటను త్వరలోనే చిత్రీకరిస్తామని చిత్రనిర్మాతలు కె.శ్రీనివాసులు, వేణుగోపాల్‌, సజ్జు చెప్పారు. సినిమాలో సాయిధరమ్‌ తేజ్‌ పోషిస్తున్న పాత్ర అభిమానులను ఎంతో అలరిస్తుందని చెప్పారు. చిత్రం టీజర్‌ విడుదలను ఓ వేడుకగా నిర్వహించనున్నట్లు తెలిపారు. మేలో ఆడియోను, అదే నెలలో సినిమాను విడుదల చేయడానికి సన్నాహాలు చేస్తున్నట్లు నిర్మాతలు చెప్పారు. రెజీనా, ప్రగ్యా జైస్వాల్‌, తులసి, జెడీ చక్రవర్తి, ప్రకాశ్‌రాజ్‌, శివాజీరాజా, రఘుబాబు, తనీశ్, ముక్తర్‌ఖాన్, సాయికిరణ్‌ ఇతర ముఖ్య పాత్రలను పోషిస్తున్న ఈ చిత్రానికి మాటలు: తోట ప్రసాద్‌, పద్మశ్రీ, కిరణ్‌ తటవర్తి, పాటలు: అనంతశ్రీరామ్‌, కాసర్ల శ్యామ్‌, ఫొటోగ్రఫీ: శ్రీకాంత్ నారోజ్‌.