తన అభిమానులతో సమావేశం కావాలని తమిళ సూపర్‌స్టార్‌ రజనీకాంత్‌ ఎట్టకేలకు నిర్ణయించినట్లు ఆయన సన్నిహితుడు ఒకరు బుధవారమిక్కడ తెలిపారు. ఈ నెల 15 నుంచి 19 వరకు ఈ కార్యక్రమం కొనసాగుతుందని, ఇందులో అభిమానులను బృందాలవారీగా రజనీకాంత్‌ కలుస్తారని ఆయన చెప్పారు. అభిమాన సంఘాలతో రజనీ భేటీపై కొన్నిరోజులుగా ప్రచారం సాగుతోంది. ఈ నేపథ్యంలో తాజాగా సూపర్‌స్టార్‌ సన్నిహితుడి నుంచి సమావేశం తేదీలు వెలువడటంతో సర్వత్రా ఆసక్తి నెలకొంది. గత నెల కూడా కోడంబాక్కంలోని శ్రీరాఘవేంద్ర కల్యాణ మండపంలో అభిమానులతో తలైవా భేటీ అవుతారని ప్రచారం సాగినా చివరకు వాయిదా పడింది. 2009లో శివాజీ సినిమా విజయవంతమైన సందర్భంగా అభిమానులతో రజనీకాంత్‌ ఫొటోలు దిగే కార్యక్రమాన్ని నిర్వహించారు.