షార్జా హమ్రియా పోర్ట్‌లో తెల్లవారు జామున జరిగిన అగ్ని ప్రమాదంలో ఓ వ్యక్తి మృతి చెందగా, ముగ్గురు గాయపడ్డారు. ఓ షిప్‌లో చోటు చేసుకున్న అగ్నిప్రమాదం కారణంగా ఈ ఘటన చోటు చేసుకుంది. రెస్క్యూ టీమ్స్‌ వెంటనే స్పందించి, బాధితులకు తగిన సహాయాన్ని అందించాయి. అలాగే మంటల్ని ఆర్పివేశాయి. అగ్ని ప్రమాదం చోటుచేసుకున్న మూడు నిమిషాల్లోనే అక్కడికి చేరుకున్న ఫైర్‌ ఫైటర్స్‌ 40 నిమిషాలు అగ్ని కీలలతో పోరాడి, వాటిని అదుపు చేశారు. ప్రమాదం జరిగిన షిప్‌, డీజిల్‌ మరియు ఆయిల్‌ ప్రోడక్ట్స్‌ని కలిగి ఉంది. అగ్ని కీలలు పోర్ట్‌లోని ఇతర షిప్‌లకు వ్యాపించకుండా సకాలంలో ఫైర్‌ ఫైటర్స్‌ చాకచక్యంగా వ్యవహరించారని షార్జా సివిల్‌ డిఫెన్స్‌ డైరెక్టర్‌ జనరల్‌ కల్నల్‌ సమి అల్‌ నక్బి చెప్పారు. అజ్మన్‌, ఉమ్‌ అలఠ్‌ కువైన్‌ నుంచి కూడా సివిల్‌ డిఫెన్స్‌ టీమ్స్‌ ఈ ఘటనలో తమ సహాయ సహకారాల్ని అందించాయి. గాయపడ్డ కార్మికుల్ని కువైట్‌ ఆసుపత్రిలోని ఇంటెన్సివ్‌ కేర్‌ యూనిట్‌కి తరలించి చికిత్స అందిస్తున్నారు. వారి పరిస్థితి నిలకడగానే ఉంది.