బాహుబలి మేనియా నుంచి సినీ జనాలు ఇప్పుడిప్పుడే బయటికొస్తున్నారు. శుక్రవారం విడుదలైన రాధ, వెంకటాపురం సినిమాలు కాసింత వినోదాన్ని పంచినా ఆశించిన స్థాయిలో ప్రేక్షకుడిని ఆకట్టుకోలేకపోయాయి. దీంతో వచ్చే శుక్రవారం విడుదల కాబోతున్న నిఖిల్ సినిమా కేశవ కోసం సినీ జనం ఆసక్తిగా ఎదురుచూస్తున్నారు. ఇప్పటికే విడుదలైన ఈ సినిమా ట్రైలర్‌కు మంచి స్పందనే వస్తోంది. టాలీవుడ్ ప్రముఖులు చాలామంది ట్రైలర్ చూసి బాగుందని నిఖిల్‌కు కితాబిచ్చారు. ఇలా వైవిధ్యభరితమైన కథాంశాలు ఎంచుకుంటున్నందుకు నిఖిల్‌ను అభినందించారు. అయితే అందరి అభినందన కంటే భల్లాలదేవుడి ఫీడ్‌బ్యాక్ నిఖిల్‌కు కొండంత బలాన్ని ఇస్తుందనే చెప్పాలి. అందరూ కేశవ ట్రైలర్ నచ్చిందని చెబితే... రానా మాత్రం నచ్చడం కాదు అదిరిపోయిందంటూ ట్వీట్ చేశాడు. దేశమంతా పొగడ్తలతో ముంచెత్తుతున్న బాహుబలి సినిమాలోని స్టార్ తమ సినిమా ట్రైలర్ చూసి ఇలాంటి స్పందన ఇవ్వడంతో చిత్ర యూనిట్ ఆనందాన్ని వ్యక్తం చేస్తోంది. రానాతో పాటు మరో యువ హీరో నితిన్ కూడా ట్రైలర్ చాలా బాగుందని ట్వీట్ చేశాడు. సాయి ధరమ్ తేజ్, సచిన్ జోషి, వరుణ్ సందేశ్, అల్లరి నరేష్ కేశవ ట్రైలర్ బాగుందని ట్వీట్ చేశారు.