భా రతీయ వెండితెర అతిలోక సుందరి శ్రీదేవి ఇప్పటికీ ఎవర్‌గ్రీన్‌ అని నిరూపించుకునేలా సినిమాలు చేసోన్నారు. ‘ఇంగ్లిష్‌ వింగ్లిష్‌’తో రీ ఎంట్రీ ఇచ్చిన ఆమె ప్రస్తుతం ‘మామ్‌’లో నటిస్తున్నారు. శ్రీదేవి సినిమాల్లోకి అడుగుపెట్టిన 50వ వసంతమిది. అంతేకాదు ‘మామ్‌’ ఆమె 300వ చిత్రం కావడం మరో విశేషం. దీనికి గుర్తుగా మామ్‌ విడుదలవుతున్న అన్ని భాషల్లోనూ తన పాత్రకి తనే డబ్బింగ్‌ చెప్పుకోనుంది శ్రీదేవి. ‘‘తెలుగు, తమిళం, మలయాళం, హిందీ భాషల్లో ‘మామ్‌’ ప్రేక్షకుల ముందుకు వస్తోంది. ఈ నాలుగు భాషల్లోనూ తన పాత్రకి తనే గాత్రం అందించనున్నారు శ్రీదేవి.

ఆమె కెరీర్‌ మొదలుపెట్టిన జులై 7నే ‘మామ్‌’ చిత్రాన్ని విడుదల చేయడానికి సన్నాహాలు చేస్తున్నారు చిత్ర నిర్మాత బోనీకపూర్‌. రవి ఉదయార్‌ దర్శకత్వంలో తెరకెక్కుతోన్న ఈ చిత్రానికి ఎ.ఆర్‌.రెహమాన్‌ స్వరాలు అందిస్తున్నారు.