సోషల్‌ మీడియాలో, ప్లాస్టిక్‌ రైస్‌పై జరుగుతున్న దుష్ప్రచారాన్ని దుబాయ్‌ మునిసిపాలిటీ ఖండించింది. దుబాయ్‌ మార్కెట్‌లలో ప్లాస్టిక్‌ రైస్‌ లభ్యమవుతున్నాయనీ, ప్లాస్టిక్‌ రైస్‌ ఆరోగ్యానికి ఎంతో హానికరమని సోషల్‌ మీడియాలో ఓ రూమర్‌ సర్క్యులేట్‌ అవుతోంది. దీనిపై దుబాయ్‌ మునిసిపాలిటీ ఫుడ్‌ సేఫ్టీ డిపార్ట్‌మెంట్‌ డైరెక్టర్‌ ఇమాన్‌ అల్‌ బస్తకి స్పందించారు. ఈ వార్తల్లో ఏమాత్రం నిజం లేదని అల్‌ బస్తకి స్పష్టం చేశారు. దుబాయ్‌ మార్కెట్లలో లభ్యమయ్యే రైస్‌ పూర్తిగా సురక్షితమని తెలియజేశారు. ప్లాస్టిక్‌ రైస్‌ని కనుగొనడం తేలిక గనుక ఎవరూ ఆందోళన చెందనక్కర్లేదని, నిజంగానే ఎవరి దృష్టికి అయినా ప్లాస్టిక్‌ రైస్‌ వస్తే వెంటనే తమకు ఫిర్యాదు చేయాలని కోరారు. ఇప్పటికప్పుడు తనిఖీలు నిర్వహించేందుకు అధికార బృందాలు సిద్ధంగా ఉన్నాయని, కాబట్టి మార్కెట్‌లో ప్లాస్టిక్‌ రైస్‌ ఆనవాళ్ళు దొరికే అవకాశం లేదని అల్‌ బస్తకి చెప్పారు.