నైరుతి రుతుపవనాలు ఈనెల 8 తరవాత తెలంగాణను తాకే అవకాశాలున్నాయని హైదరాబాద్‌ వాతావరణ కేంద్రం సంచాలకురాలు డాక్టర్‌ నాగరత్న తెలిపారు. 8, 9 తేదీల్లో రాష్ట్రంలో భారీ వర్షాలు పడే అవకాశాలున్నాయని, వీటికి రుతుపవనాల రాకనే కారణమని అంచనా వేస్తున్నట్లు తెలిపారు. గత వారం రోజులుగా కేరళ రాష్ట్రంలోనే ఆగిన రుతుపవనాలు అక్కడి నుంచి ముందుకు కదలలేదు. రాబోయే 3, 4 రోజుల్లో అవి కర్ణాటక, రాయలసీమ, తెలంగాణ వరకూ వచ్చే అవకాశాలున్నాయని ఆమె వివరించారు. ప్రస్తుతం ఝార్ఖండ్‌ నుంచి తెలంగాణ వరకూ ఉపరితల ఆవర్తనముంది. దీని ప్రభావంతో అక్కడక్కడ ఉరుములు, మెరుపులతో కూడిన వర్షాలు కురుస్తున్నాయి. వీటివల్ల పలు ప్రాంతాల్లో పగటి ఉష్ణోగ్రతలు 40 డిగ్రీలలోపు నమోదవుతున్నాయి. ఇంకా తగ్గుతాయని అంచనా. నైరుతి రుతుపవనాలు ఈనెల 5 కల్లా తెలంగాణకు వస్తాయని తొలుత వాతావరణశాఖ వేసిన అంచనా ఇప్పుడు తప్పింది.
ఈనెల 8లోపు వచ్చే అవకాశాలు లేవు. గతేడాది జూన్‌ 17న తెలంగాణకు రుతుపవనాలు వచ్చాయి. ఈసారి వేచి చూడాల్సిన అవసరం ఉండకపోవచ్చని నాగరత్న వివరించారు.