సోషల్‌ మీడియా వినియోగదారులు, ఆన్‌లైన్‌ ద్వారా జరుగుతున్న ఫ్రాడ్‌ క్యాంపెయిన్‌పై అప్రమత్తంగా ఉండాలని సౌదీ అరేబియా ఇంటీరియర్‌ మినిస్ట్రీ హెచ్చరించింది. సిరియన్‌ బాధిత కుటుంబాలను ఆదుకునేందుకోసం ఆర్థిక సహాయం అందించాలంటూ కొందరు సోషల్‌ మీడియా వేదికగా ప్రచారం నిర్వహిస్తున్నారనీ, అలాంటి వాటి పట్ల ఆకర్షితులు కారాదని సౌదీ మినిస్ట్రీ పేర్కొంది. మినిస్ట్రీ ఆఫ్‌ ఇంటీరియర్‌ - డిపార్ట్‌మెంట్‌ ఆఫ్‌ పబ్లిక్‌ రిలేషన్స్‌ అండ్‌ మీడియా డైరెక్టర్‌ జనరల్‌ మేజర్‌ జనరల్‌ డాక్టర్‌ మొహమ్మద్‌ బిన్‌ అబ్దుల్లా అల్‌ మరౌల్‌ మాట్లాడుతూ, మినిస్ట్రీకి సోషల్‌ మీడియా ఫ్రాడ్స్‌పై పలు ఫిర్యాదులు వచ్చినట్లు తెలిపారు. ఈ కారణంగానే సోషల్‌ మీడియా వినియోగదారులకు హెచ్చరికలతో కూడిన సూచనలు చేసినట్లు పేర్కొన్నారు. ఎవరైనా అలాంటి ఫ్రాడ్‌ ప్రచారాలను నిర్వహిస్తున్నట్లు కనుగొంటే సంబంధిత అధికార యంత్రాంగానికి పిర్యాదు చేయాలని తెలిపారు.