అల్లు అర్జున్ `డీజే దువ్వాడ జగన్నాథమ్ వివాదం ఇంకా సమసిపోలేదు. ఈ సినిమాలో `అస్మైక యోగ తస్మైక భోగ..` అనే పాటలో `నమకం..చమకం..` అనే పదాలు అభ్యంతరకరంగా ఉన్నాయని, ఓ వర్గాన్ని కించపరిచేలా ఉన్నాయని వివాదం చెలరేగిన సంగతి విదితమే. ఈ వివాదంపై స్పందించిన చిత్ర దర్శక నిర్మాతలు సెన్సార్ సమయంలోనే నమకం..చమకం అనే పదాలను మార్చి వాటి స్థానంలో నా గమకం..నీ సుముఖం అనే పదాలను పొందుపరిచి సెన్సార్ సభ్యుల నుండి అమోదం పొందారు.

అయితే ఇపుడీ వ్యవహారం కోర్టుకు వెళ్ళింది. యజుర్వేదంలో ఉన్న నమకం, చమకం వంటి పవిత్రమైన పదాలను ఈ సినిమాలోని రొమాంటిక్ పాటలో ఉపయోగించడాన్ని సవాలు చేస్తూ ఉమ్మడి హైకోర్టులో ప్రజాప్రయోజన వ్యాజ్యం దాఖలైంది. రంగారెడ్డి జిల్లాకు చెందిన జి.కృష్ణమోహన్‌ ఈ పిటిషన్‌ను దాఖలు చేస్తూ అభ్యంతరకరమైన పదాలపై సెన్సార్‌ బోర్డుకు వినతిపత్రం సమర్పించినా వాటిని తొలగించడానికి ఎలాంటి చర్యలు తీసుకోలేదని, దీంతో హైకోర్టును ఆశ్రయించాల్సి వచ్చిందని, వాటిని తొలగించేదాకా సినిమాపై నిషేధం విధించాలని కోరారు ఆయన. మరి ఈ వివాదం ఎక్కడికి వెళుతుందో చూడాలి.