న్యూదిల్లీ: బంగారం ధర మరోసారి పడిపోయింది. వరుసగా నాలుగురోజుల పాటు తగ్గుతూ వస్తున్న బంగారం ధర శుక్రవారం తిరిగి పుంజుకున్న సంగతి తెలిసిందే. అయితే శనివారం నాటి ట్రేడింగ్లో 10గ్రాముల స్వచ్ఛమైన పసిడి రూ.250 తగ్గి రూ.28,900కి చేరింది. డాలర్ బలపడటంతో బంగారం ధర తగ్గిందని బులియన్ మార్కెట్ వర్గాలు తెలిపాయి. బంగారంలో పెట్టుబడి సురక్షితమైనా.. అంతర్జాతీయ పరిస్థితుల నేపథ్యంలో మదుపరులు తమ పొజిషన్లను డాలర్కు అనుకూలంగా మార్చుకోవడంతో బంగారం ధర ఒక్కసారిగా పడిపోయింది. మరోపక్క అమ్మకాల ఒత్తిడితో వెండి ధర రూ.38వేల దిగువకు పడిపోయింది. శనివారం కిలో వెండి రూ.800 తగ్గి రూ.37,400లకు చేరింది. అంతర్జాతీయంగా బంగారం ధర 1.04శాతం తగ్గి, ఔన్సు 1,221.20 డాలర్లు పలికింది.