టాలీవుడ్ మొత్తం కుతకుత ఉడికిపోతోంది. రేపు ఏం జరుగుతుందోనన్న గుబులు ప్రతీ సినిమా సర్కిల్ నీ పిచ్చెక్కిస్తోంది. మాదకద్రవ్యాల ఉచ్చులో పడి దాదాపు టాలీవుడ్ పెద్ద కుటుంబాలన్నీ గిలగిల్లాడిపోతున్నట్లు స్పష్టమైన సంకేతాలు కనిపిస్తున్నాయి. కానీ.. తెలుగు సినిమా చౌరస్తాలో నిలబడి, ప్రతి సందర్భానికీ స్పందించే అలవాటున్న రామ్ గోపాల్ వర్మ మాత్రం సైలెంట్ గా ఉండిపోయారు. ఆయన ట్విట్టర్ అంటే మూసుకుపోయింది. కనీసం ఇన్ స్టాగ్రామ్ లోనైనా ఓ ముక్క మాట్లాడొచ్చుగా అంటూ అటు అభిమానులు, ఇటు విమర్శకులు సూటిగానే ప్రశ్నిస్తున్నారు.
ప్రతి అంశాన్ని సమర్థించడమో లేదా విమర్శించడమో చేసే 'మంచి' అలవాటున్న వర్మ.. ఆ విధంగా తన ఉనికిని కాపాడుకోవడంలో సక్సెస్ అయ్యారు కూడా. నిజానికి. వర్మ సినిమాల కంటే.. వర్మ ట్వీట్ల కోసమో, టీవీల్లో వర్మ ఇంటర్వ్యూల కోసమో మాత్రమే జనం ఎదురుచూస్తారు. వర్మ మార్క్ నిశిత విమర్శ మీద సినిమా, సినిమాయేతర వర్గాల్లో కూడా అంతులేని ఆసక్తి. వర్మ స్టైల్ ఆఫ్ క్రిటిసిజాన్ని ఇష్టపడేవాళ్ళూ ఎక్కువే. ఒక వివాదాన్ని గానీ, ఒక ఘటనను గానీ వర్మ చూసే కోణం విశిష్టంగా ఉంటుందని చెప్పుకుంటారు. అటువంటి వర్మ.. ఇంతటి సంక్షోభ సమయంలో కూడా చిత్రపరిశ్రమని 'ఒంటరి'గా వదిలెయ్యడం భావ్యం కాదు !
ఆ మధ్య ట్విట్టర్ ని వదిలేస్తున్నానంటూ సెన్సేషన్ క్రియేట్ చేశారు. షార్ట్ ఫిలిమ్స్ తో ప్రకంపనలు సృష్టించడం మొదలుపెట్టారు. ఇటీవల ఎన్టీయార్ బయోపిక్ తీస్తానంటూ ఒక వాయిస్ ప్రజెంటేషన్ ని జనం మీదకు వదిలి.. జడిపించేశారు. బహుశా.. ఆ 'భయోపిక్' మేకింగ్ లో బిజీగా ఉన్నారా లేక.. మరెక్కడికైనా వెళ్లిపోయారా? అంటూ వర్మ ఫ్యాన్స్ బెంగ పెట్టుకున్నారు. కాకపోతే.. వర్మ కూడా 'డ్రగ్స్' వాసన తెలిసినవాడేనన్న వాదన ఒకప్పుడు ఫిలిం సర్కిల్స్ లో నడిచింది. ఈ డ్రగ్స్ గొడవలో తల దూర్చడం శ్రేయస్కరం కాదని సైలెంట్ అయిపోయారా? కానీ.. పేరులోనే 'వోడ్కా'ను వాడుకున్న వర్మ.. ఈ చప్పుళ్లకు భయపడే ఛాన్సే లేదన్నది అతడి ఫ్యాన్ క్లబ్ భరోసా !