ఉత్తర ఒడిశా, పశ్చిమబెంగాల్‌ తీరం ఆనుకుని వాయువ్య బంగాళాఖాతంలో సముద్రమట్టానికి 4.5 కిలోమీటర్ల ఎత్తులో ఉపరితల ఆవర్తనం ఏర్పడిందని వాతావరణ శాఖ అధికారులు తెలిపారు. ఇది ఆదివారంలోపు అల్పపీడనంగా మారే అవకాశం ఉందని వివరించారు. ప్రస్తుతం ఆంధ్రప్రదేశ్‌ మీదుగా మరో ఉపరితల ఆవర్తనం కూడా ఉన్నట్లు వెల్లడించారు. ఇంతకుముందు ఏర్పడిన ద్రోణి ఇంకా కొనసాగుతోంది. అల్పపీడనం ప్రభావం వల్ల కోస్తాలో కొన్నిచోట్ల రానున్న రెండ్రోజుల్లో భారీ వర్షాలు నమోదయ్యే అవకాశాలున్నాయని అధికారులు చెప్పారు. మిగిలిన ప్రాంతాల్లో రానున్న నాలుగు రోజులు తేలికపాటి నుంచి మోస్తరు జల్లులు అక్కడక్కడ కురిసే అవకాశం ఉందని తెలిపారు.