పార్క్‌ చేసి ఉన్న కార్లలో దొంగతనాలకు పాల్పడుతున్న ఇద్దరు వ్యక్తుల్ని అరెస్ట్‌ చేశారు పోలీసులు. ముహరాక్‌ పోలీసులు వెల్లడించిన వివరాల ప్రకారం, అరెస్ట్‌ అయిన నిందితులు పార్క్‌ చేసిన వాహనాల్లో విలువైన వస్తువుల్ని తస్కరిస్తూ ఉండేవారు. పలు ఫిర్యాదుల నేపథ్యంలో పోలీసులు అలెర్ట్‌ అయ్యారు. దొంగతనాలు జరిగిన ప్రాంతాల్లోని సీసీటీవీ ఫుటేజ్‌లను పరిశీలించి, నిందితుల్ని గుర్తించగలిగారు. ముహరాక్‌ సహా కింగ్‌డమ్‌లోని పలు ప్రాంతాల్లో ఈ తరహా దొంగతనాలకు పాల్పడినట్లు నిందితులు విచారణలో అంగీకరించారు. దొంగతనం చేయడానికి కార్ల అద్దాల్ని పగలగొట్టేవాళ్ళమని నిందితులు తెలిపారు. నిందితుల నుంచి దొంగతనాలకు ఉపయోగించే పనిముట్లను కూడా పోలీసులు స్వాధీనం చేసుకున్నారు.