బెంగళూరు: ప్రముఖ కన్నడ నటుడు, నిర్మాత, గాయకుడు ఆర్‌.ఎన్‌. సుదర్శన్‌ (78) కన్నమూశారు. గత కొన్ని రోజులుగా ఆయన మూత్రపిండాల సంబంధిత వ్యాధితో బాధపడుతూ ఓ ప్రైవేటు ఆసుపత్రిలో చికిత్స పొందుతున్నారు. పరిస్థితి విషమించి శుక్రవారం తుదిశ్వాస విడిచారు. సుదర్శన్‌ దాదాపు 250కు పైగా చిత్రాల్లో పనిచేశారు. ఆయన తన ఐదు దశాబ్దాల సినీ కెరీర్‌లో కన్నడ, తెలుగు, తమిళ, మలయాళ భాషా చిత్రాల్లో నటించి గుర్తింపు తెచ్చుకున్నారు.
విలక్షణ నటుడు కమల్‌హాసన్‌ నటించిన 'నాయకుడు'లో సుదర్శన్‌ విలన్‌ పాత్రలో కనిపించారు. 2010లో ఉపేంద్ర తెరకెక్కించిన కన్నడ చిత్రం 'సూపర్‌' ఆయన చివరి చిత్రం. సుదర్శన్‌ పలు ధారావాహికల్లోనూ నటించారు.
సుదర్శన్‌ మృతిపట్ల పలువురు సినీ ప్రముఖులు సంతాపం తెలిపారు. నటీమణులు రాధిక, సుమలత ఆయన ఆత్మకు శాంతి చేకూరాలని కోరుకుంటూ ట్వీట్లు చేశారు. ఆయన కుటుంబానికి ప్రగాఢ సానుభూతి తెలిపారు.