ఐశ్వరి సింగ్‌ విశ్వకర్మ అనే మహిళ, ఓలా క్యాబ్‌లో ఓ బిడ్డకు జన్మనిచ్చారు. డెలివరీ కోసం ఆసుపత్రికి వెళుతుండగా, కారులోనే అక్టోబర్‌ 2న ఆమె ఓ బిడ్డకు జన్మనివ్వడం జరిగింది. దాంతో, ఓలా కంపెనీ ఐశ్వరి సింగ్‌ విశ్వకర్మతోపాటుగా ఆమె కుమారుడికి ఐదేళ్ళపాటు ఉచిత ప్రయాణ సౌకర్యాన్ని 'బహుమతి'గా ప్రకటించడం గమనించదగ్గ విషయం. అక్టోబర్‌ 24వ తేదీని డెలివరీ డేట్‌గా డాక్టర్లు చెప్పారనీ, అయితే అక్టోబర్‌ 2న ఉదయం ఒంట్లో నలతగా ఉండటంతో ఆసుపత్రికి వెళ్ళేందుకు సమాయత్తమయ్యామనీ, క్యాబ్‌ రావడంతో అందులో కూర్చున్నామనీ, దారిలో లేబర్‌ పెయిన్స్‌ రావడం, బాబు జన్మించడం జరిగాయని ఐశ్వరి భర్త రమేష్‌ సింగ్‌ విశ్వకర్మ చెప్పారు. తన తల్లినీ, సోదరుడ్ని కారులో తన భార్యతో సహా పంపి, తాను బైక్‌లో వెనకాలే వెళ్ళాననీ, నాలుగు కిలోమీటర్ల ప్రయాణం అనంతరం, తన భార్యకి డెలివరీ అవుతోందని ఫోన్‌ వచ్చిందని చెప్పారాయన. చిత్రమేంటంటే ఇదే ఐశ్వరికి తొలి కారు ప్రయాణం. తల్లి, బిడ్డ ఇద్దరూ క్షేమంగా ఉన్నారు. తన కారులో ఓ మహిళ ప్రసవించడం చాలా థ్రిల్‌కి గురిచేసిందని క్యాబీ యశ్వంత్‌ గలాండె చెప్పారు. ముందస్తుగా ఆసుపత్రికి సమాచారం ఇవ్వడంతో అప్పటికే జన్మించిన బిడ్డకు, జన్మనిచ్చిన తల్లికి తక్షణ వైద్య సహాయం అందించారు.