తమిళ హీరో జై చిక్కుల్లో పడ్డారు. చెన్నైలోని సైదాపేట్‌ మెట్రోపాలిటన్‌ మెజిస్ట్రేట్‌ న్యాయస్థానం గురువారం ఆయనపై నాన్‌ బెయిలబుల్‌ అరెస్ట్‌ వారెంట్‌ జారీ చేసింది. మద్యం మత్తులో వాహనం నడిపిన కేసులో ఆయన గురువారం న్యాయమూర్తి ఎదుట హాజరుకావాల్సి ఉంది. అయితే జై రాకపోవడంతో తీవ్రంగా పరిగణించిన కోర్టు ఆయనపై నాన్‌ బెయిలబుల్‌ అరెస్ట్‌ వారెంట్‌ జారీ చేసింది.

సెప్టెంబరు 21న జై మద్యం మత్తులో కారు నడుపుతూ చెన్నైలోని ఆడ్యార్‌ ఫ్లై ఓవర్‌ను ఢీ కొట్టారు. ఈ నేపథ్యంలో పోలీసులు ఆయన్ని అరెస్టు చేయగా, బెయిలుపై విడుదలయ్యారు. డ్రైవింగ్‌ లైసెన్సును రద్దు చేసుకోవాలని... లేదంటే అక్టోబరు 5న కోర్టు ముందు హాజరు కావాల్సి ఉంటుందని పోలీసులు ఆయనకు సూచించారు. కానీ జై కోర్టు ముందు హాజరు కాలేదు.

'జర్నీ', 'రాజా రాణి' చిత్రాలతో జై తెలుగు ప్రేక్షకులకు సుపరిచితుడే. జై, అంజలి జంటగా నటించిన 'బెలూన్‌' చిత్రాన్ని ఈ నెల 28న ప్రేక్షకుల ముందుకు తీసుకురావడానికి సన్నాహాలు చేస్తున్నారు. ఈ సినిమా తెలుగు ఫస్ట్‌లుక్‌ను గురువారం విడుదల చేశారు.