నవంబరు 8, 2016... దేశం గతినే మార్చేసిన రోజది. పెద్దనోట్లు రద్దు చేస్తున్నట్లు ప్రధాని నరేంద్ర మోదీ చేసిన సంచలన ప్రకటనతో దేశం మొత్తం ఉలిక్కిపడింది.పాతనోట్లు మార్చుకునేందుకు గంటల తరబడి బ్యాంకుల వద్ద గడిపినామోదీ తీసుకున్న నిర్ణయాన్ని ప్రజలు స్వాగతించారు. అయితే ఈ అంశంపై ఆస్కార్‌ అవార్డు గ్రహీత ఏఆర్‌ రెహమాన్‌ ఓ పాటను రూపొందించారు. పెద్దనోట్ల రద్దు సమయంలో ప్రజల మానసిక ఆలోచనలు, వారి ఆర్థిక ఇబ్బందుల ఆధారంగా 'ది ఫ్లయింగ్‌ లోటస్‌' అనే పాటను శుక్రవారం మార్కెట్లో విడుదల చేశారు. ఇది 19 నిమిషాల నిడివి ఉంది. ఈ పాట రాజకీయ పరంగా కాకుండా.. కళాత్మకంగా పాడానని రెహమాన్‌ వివరించారు. ప్రధాని మోదీ తీసుకున్న నిర్ణయం దేశంలో పెద్ద పరిణామమని, దేశాభివృద్ధికి సంబంధించిన ఈ అంశంపై తాను తన కళ ద్వారా స్పందించాలనుకున్నానని వ్యాఖ్యానించారు.