స్టైలిష్ స్టార్ అల్లు అర్జున్ హీరోగా వక్కంతం వంశీ దర్శకత్వంలో తెరకెక్కుతున్న కొత్తచిత్రం 'నా పేరు సూర్య నా ఇల్లు ఇండియా'. కె నాగబాబు సమర్పణలో, రామలక్ష్మీ సినీ క్రియేషన్స్ బ్యానర్లో శిరీష శ్రీధర్ నిర్మాతగా, బన్నీ వాసు సహ నిర్మాతగా ఈ చిత్రాన్ని నిర్మిస్తున్నారు. బన్నీ సరసన అను ఇమ్మాన్యుయేల్ హీరోయిన్‌గా నటిస్తోంది. చిత్రంలో బన్నీ ఆర్మ్ ఆఫీసర్ పాత్రలో దర్శనమీయనున్నాడు. ప్రస్తుతం ఈ చిత్ర షూటింగ్ ఇండో-పాక్ సరిహద్దు ప్రాంతంలో జరుగుతోంది. చిత్రానికి సంబంధించిన ముఖ్య సన్నివేశాలను అక్కడ చిత్రీకరిస్తున్నారు.

అయితే షూటింగ్‌లో భాగంగా సెట్స్‌పై బన్నీ.. అక్కడి సైనికులతో వాలీబాల్ ఆడి తెగ సందడి చేశారు. ఈ వీడియోను తన ఇన్‌స్టాగ్రామ్ ద్వారా అభిమానులతో పంచుకున్నాడు బన్నీ. ఓ సైనికుడి గెటప్ లో బన్నీ వాలీబాల్ ఆడుతుండటం మెగా అభిమానులకు కన్నుల పండుగ అయింది. ప్రస్తుతం ఈ వీడియో సోషల్ మీడియాను ఊపేస్తూ లైకులు, షేర్స్‌తో దూసుకుపోతోంది.

ఏప్రిల్ 27న ప్రేక్షకుల ముందుకు రాబోతున్న ఈ సినిమాలో యాక్షన్ కింగ్ అర్జున్, శరత్ కుమార్ ముఖ్య పాత్రల్లో నటిస్తున్నారు. ఇప్పటికే విడుదలైన ఫస్ట్ లుక్, లిరికల్ సాంగ్స్ మంచి రెస్పాన్స్ తెచ్చుకోవడంతో సినిమాపై భారీ అంచనాలు నెలకొన్నాయి.