మొజాంబిక్‌- 17మంది మృతి, పలువురికి గాయాలు 
మపుటో: మొజాంబిక్‌ రాజధాని మపుటో నగరంలో సోమవారం నుండి కురుస్తున్న భారీ వర్షాలకు నగర శివార్లలో వున్న ఒక చెత్తకుప్ప కుప్పకూలిన ఘటనలో కనీసం 17 మంది మరణించారని, పలువురు గాయపడ్డారని అధికారులు చెప్పారు. సోమవారం రాత్రి ఈ ప్రమాదం జరిగిన సమయంలో ఈ పరిసర ప్రాంతాలలో నివశించే వారంతా నిద్రలో వున్నారని, భారీ వర్షాలతో కుంగిన చెత్తకుప్ప పక్కనే వున్న ఇళ్లపై కూలిపోవటంత వారంతా తమ ఇళ్లలోనే సజీవ సమాధి అయ్యారని తెలుస్తోంది. సమాచారం తెలుసుకున్న అధికారులు మంగళవారం ఉదయం నుండి అక్కడ సహాయ కార్యక్రమాలు ప్రారంభించారు. అగ్నిమాపక సిబ్బంది శిధిలాల్లో చిక్కుకున్న వారితో పాటు మృతదేహాల కోసం గాలింపు ప్రారంభించారు. భవిష్యత్తులో ఇటువంటి ప్రమాదాలు జరగకుండా తగిన చర్యలు తీసుకునే అంశంపై చర్చించేందుకు అధికారయంత్రాంగం మంగళవారం భేటీ అవుతోందని మపుటో సిటీ గవర్నర్‌ యోలాండా సించురా చెప్పారు. ఈ దుర్ఘటనలో ఇళ్లు కోల్పోయిన వారిని గుర్తించి వారికి ప్రత్యామ్నాయ ఏర్పాట్లు చేయనున్నట్లు ప్రభుత్వం ఇప్పటికే ప్రకటించిందని ఆమె వివరించారు రాజధాని మపుటోనగరంలోకుప్పకూలిన చెత్తకుప్ప.