చెన్నై, న్యూస్‌టుడే: జ్ఞానవేల్‌రాజా నిర్మాణంలో స్టూడియోగ్రీన్‌ బ్యానరుపై ఆర్య హీరోగా నటిస్తున్న చిత్రం 'గజనికాంత్‌'. సాయేషా కథానాయిక. బాలమురళి బాలు సంగీతం సమకూర్చుతున్నారు. కరుణాకరన్‌, సతీష్‌, కాళివెంకట్‌, రాజేంద్రన్‌, సంపత్‌లు ఇతర తారాగణం. తెలుగులో విజయం సాధించిన 'భలే భలే మగాడివోయ్‌'కి ఇది రీమేక్‌. 'ధర్మత్తిన్‌ తలైవన్‌' చిత్రంలోని రజనీకాంత్‌ గెటప్‌లో ఆర్య ఉన్నట్లు ఇటీవల ఫస్ట్‌లుక్‌ను విడుదల చేశారు. దీనికి మంచి స్పందన వచ్చింది. ఇదిలా ఉండగా సినిమా చిత్రీకరణ కొన్నిరోజుల క్రితమే పూర్తయింది. దీంతో డబ్బింగ్‌ పనులను ప్రారంభించారు. నగరంలోని నాక్‌ స్టూడియోస్‌లో ప్రస్తుతం డబ్బింగ్‌ పనులు శరవేగంగా జరుగుతున్నాయి. మార్చిలో ఆడియోను విడుదల చేసి ఏప్రిల్‌లో చిత్రాన్ని విడుదల చేయనున్నట్లు సమాచారం.