చెన్నై: 1990లలో తెలుగు, తమిళ పరిశ్రమను తన అందం, అభినయంతో మెప్పించిన నటి రంభ. రజనీకాంత్‌, కమల్‌, చిరంజీవి, విజయ్‌, అజిత్‌, కార్తిక్‌, ప్రభు.. ఇలా పెద్ద హీరోలతో నటించి మెప్పించారు. 15 ఏళ్ల క్రితమే నటనకు కాస్త బ్రేక్‌ ఇచ్చారు రంభ. పెళ్లి తర్వాత భర్త, పిల్లలతో పాటు కెనడాలో స్థిరపడ్డారు. పలు కారణాలతో మళ్లీ చెన్నైకి వచ్చి కొన్ని టీవీ కార్యక్రమాల్లో న్యాయనిర్ణేతగా వ్యవహరించారు. ఇప్పుడు మళ్లీ సినిమాల్లో నటించడానికి ఆసక్తి కనబరుస్తున్నారు. సాధారణంగా సీనియర్‌ నటీమణులు రీ ఎంట్రీ ఇస్తే తల్లి పాత్రల్లోనే అధికంగా కనిపిస్తారు. కానీ రంభ అందుకు భిన్నమైన పాత్రలో కనిపించనుందని సమాచారం. తాజాగా ఓ సినిమాలో నటించడానికి ఒప్పుకున్నారని కోలీవుడ్‌ వర్గాలు చెబుతున్నాయి. అయితే అది ఎలాంటి పాత్ర అనేది ఇంకా స్పష్టం కాలేదు. తెలుగులోను అవకాశాల కోసం రంభ ప్రయత్నిస్తున్నట్లు వార్తలు వినిపిస్తున్నాయి.