గత జీవితమెంత ఘనమైనది

ధనమున్న పర్వము

సార్వభౌముల మన్న గర్వము!

జ్ఞాపకాల విలువతో

జ్ఞానోదయం కలిగించి

బ్రతుకు బాటలో

గతుకులెన్నో లెక్కకట్టి

గుర్తు తెచ్చుకునే గత జీవితం

నిజంగా ఘనమైనది

గౌరవమైనది గొప్ప ఘాటైనది!

బరువైన జీవితం విలువెంతని అడిగితే

పెరిగిన ఇంటి పోరుతో

తరగని రక్త పోటుతో

పరుగులెత్తే రూపాయి వెనుక

తరుము కుంటూ పరుగెత్తి

ఓడిపోయిన పోటీతో

అరిగిపోయిన చెప్పులాంటి జీవితం!

అనుభవాలతో అనుభూతులతో

అమ్మో చెప్పలేని గొప్ప జీవితం

చల్లారిపోయిన కాఫీ కప్పులాంటి జీవితం

నా గత జీవితం ఘనమైన జీవితం

చరిత్ర రాసి చివర సంతకం లేని కాగితం

అంతు దొరకని అనామకుడి భాగోతం

అందరికి వినపడని అదోలాంటి సుప్రభాతం!

                    ---- డా|| కోడి రామ, అలైన్, యు ఏ యి.