కళ్లు తెరిచే ఉన్నాను
చుట్టూ కటిక చీకటి;
చెవులు పనిచేస్తూనే ఉన్నాయ్
కానీ పక్కవాడు చెప్పేది వినపడలేదు;
కళ్ల ముందు మనలాంటిదే మరో లోకం
చెవులకి వినిపించేది ఆ లోకం తాలూకు శబ్దాలు;
నవ్వాను,
నిశ్శబ్దంగా ఏడ్చాను,
కోపంతో రగిలిపోయాను, 
అంతలోనే ఉపశాంతి పొందాను;
అంతా ఒక తాదాత్మ్యం
జాగృదావస్థలో అలౌకికానందం;
ఏ జ్ఞానికో, ఏ సన్యాసికో, ఏ యోగికో
ఏళ్ల కృషి తర్వాత సిధ్ధిస్తుందని వినే ఆ స్థితిని-
రోజుకు నాలుగు సార్లు ఎవ్వడికైనా ఇవ్వగలిగే ధ్యాన మందిరం-
సినిమా హాల్

- సిరాశ్రీ