షార్జా రోడ్స్‌ అండ్‌ ట్రాన్స్‌పోర్ట్‌ అథారిటీ కొత్తగా 10 లగ్జరీ బస్సుల్ని ఇంటర్‌సిటీ ఫ్లీట్‌కి జతచేసింది. ఈ కొత్త బస్సుల రాకతో, సుదూర ప్రయాణాలు చేసేవారికి ఉపశమనం కలుగుతుంది. వారాంతాల్లో ఈ బస్సులకు పెరుగుతున్న రద్దీ నేపథ్యంలో కొత్తగా 10 బస్సుల్ని ప్రవేశపెట్టారు. వాల్వో కంపెనీకి చెందిన ఈ బస్సుల్లో మొత్తం 46 సీట్లు వుంటాయి. మంచి ఎయిర్‌ కండిషనింగ్‌ వ్యవస్థ, వైఫై సౌకర్యాలు, వీటితోపాటుగా సీసీటీవీ కెమెరాలు వెరసి అధునాతన సాంకేతిక పరిజ్ఞానంతో కూడిన బస్సులు, ప్రయాణీకులకు సుదూర ప్రయాణాల్లో మధురానుభూతిని మిగల్చనున్నాయి. రివర్స్‌ పార్కింగ్‌ కెమెరా డ్రైవర్‌కి వీలుగా ఏర్పాటు చేశారు. తక్కువ దూరం ప్రయాణించేవారికి 5 నుంచి 20 దిర్హామ్‌ల ఖర్చుతోనూ, దూర ప్రయాణాలు 20 నుంచి 30 దిర్హామ్‌ల ఖర్చుతోనూ విలావసంతమైన బస్సులు ఏర్పాటు చేశారు. గత ఏడాది 39 బస్సుల్ని ప్రవేశపెట్టిన షార్జా రోడ్స్‌ ట్రాన్స్‌పోర్ట్‌ అథారిటీ, తాజాగా ప్రవేశపెట్టిన బస్సులతో కలిపి మొత్తం 69 లగ్జరీ బస్సుల్ని ప్రయాణీకులకు సేవలందించేలా వినియోగిస్తోంది.