విజయ్ సేతుపతి, రాశీ ఖన్నా జంటగా విజయా ప్రొడక్షన్ వారి నిర్మాణంలో తమిళంలో నిర్మాణమవుతున్న 'సంగతమిళ్' మూవీని హర్షిత మూవీస్ వారు తెలుగులో 'విజయ్ సేతుపతి' పేరుతో విడుదల చేయనున్నారు. రెండు భాషల్లో నవంబర్ 15న విడుదల చేసేందుకు నిర్మాతలు సన్నాహాలు చేస్తున్నారు. సౌత్‌లో సెల్ఫ్ మేడ్ స్టార్స్‌లో విజయ్ సేతుపతి స్థానం ప్రత్యేకంగా నిలుస్తుంది. 'సైరా'తో నేరుగా తెలుగు ప్రేక్షకులకు పరిచయం అయిన విజయ్ సేతుపతికి తెలుగులో మంచి ఆదరణ ఉంది. త్వరలోనే ఆ ఆదరణ 'విజయ్ సేతుపతి'తో మరింత పెరుగుతుందని చిత్ర యూనిట్ అంటుంది. త్వరలోనే ప్రీ రిలీజ్ ఈవెంట్‌ని గ్రాండ్‌గా చేసేందుకు నిర్మాతలు సన్నాహాలు చేస్తున్నారు. విజయ్ సేతుపతితో పాటు చిత్రయూనిట్ అందరూ ఈ వేడుకకు హాజరుకానున్నారు.

ఈ సందర్భంగా నిర్మాత రావురి వి. శ్రీనివాస్ మాట్లాడుతూ.. ''అవుట్ అండ్ అవుట్ యాక్షన్ ఎంటర్‌టైనర్‌గా రూపొందిన 'విజయ్ సేతుపతి' తెలుగు ప్రేక్షకుల ఆదరణ పొందుతుంది అని నమ్ముతున్నాను. విజయ్ సేతుపతి సినిమాను తెలుగులో రిలీజ్ చేయడం చాలా ఆనందంగా ఉంది. రాశీఖన్నా, నాజర్, నివేద పేతురాజ్, అశుతోష్ రాణా తెలుగు ప్రేక్షకులకు బాగా దగ్గరయిన వారే కావడంతో ఈ సినిమా స్ట్రైయిట్ సినిమాగానే ప్రేక్షకులు ఆదరిస్తారనే నమ్మకం ఉంది. ఈ సినిమాలో యాక్షన్ సన్నివేశాలకు ప్రత్యేకమైన ప్రశంసలు దక్కుతాయి. త్వరలోనే ప్రీ రిలీజ్ వేడుకను భారీగా నిర్వహించనున్నాము..'' అన్నారు.