దుబాయ్:యూఏఈ- భారత్ మధ్య మైత్రి మరింత బలపడేందుకు కింగ్డమ్ లోని ఇండియా వ్యాపారవేత్తల కృషి మరువలేనిది అని భారత విదేశాంగ, పార్లమెంటరీ వ్యవహారాల మంత్రి మురళీధరన్ ప్రశంసించారు. కోవిడ్ సమయంలో వారు ప్రతిస్పందించిన తీరు..నిస్సాయులను ఆదుకున్న తీరును ఆయన కొనియాడారు. యూఏఈ పర్యటనలో ఉన్న ఆయన యూఏఈలోని భారత వ్యాపారవేత్తల ప్రతినిధులతో సమావేశం అయ్యారు. దుబాయ్ లోని హోటల్ తాజ్ బిజినెస్ బేలో జరిగిన ఇంటరాక్షన్ లో మాట్లాడిన కేంద్రమంత్రి...యూఏఈలోని భారత వ్యాపారుల కృషి, కష్టపడే తత్వం, చిత్తశుద్ధిని కింగ్డమ్ నాయకత్వం కూడా ప్రశంసించకుండా ఉండలేకపోతుందన్నారు. అందుకే స్థానిక వ్యాపార రంగ ప్రతినిధులు అంతా భారత్, యూఏఈ మధ్య అనధికార రాయబారులుగానే తాము భావిస్తామని పేర్కొన్నారు.

కోవిడ్ సంక్షోభంలో కింగ్డమ్ లోని భారత సమాజానికి వ్యాపారవేత్తలు అందించిన సహకారాన్ని ఆయన కొడియాడారు. అవసరమైన వారికి టికెట్లు సమకూర్చటం, ఆహారం, మెడిసిన్, ఇతర సదుపాయాలు కల్పించి ఐక్యతను చాటారని ప్రశంసించారు. కాన్సులేట్, ఎంబసీలకు సమాంతరంగా వ్యాపారులు, సోషల్ ఆర్గనైజేషన్స్ కృషి చేశాయన్నారు. అదే స్ఫూర్తితో బ్లూ కాలర్ కార్మికుల నైపుణ్యతను పెంచేందుకు కూడా తోడ్పడాలని కోరారు కేంద్రమంత్రి. వందే భారత్ మిషన్ ఇంప్లిమెంటేషన్ విజయవంతం అయ్యేందుకు యూఏఈ ప్రభుత్వం కూడా ఎంతగానో సహకరించిందని ఆయన అన్నారు.