ట్రాఫిక్‌ నిబంధనల్ని ఉల్లంఘించే విదేశీయుల్ని జైలుకు పంపేందుకూ వెనుకాడబోమని రాయల్‌ ఒమాన్ పోలీసులు హెచ్చరిస్తున్నారు. విచ్చలవిడిగా నిబంధనలు ఉల్లంఘిస్తున్నవారు ఫైన్‌ కట్టకుండా దేశం దాటకుండా ఉండేందుకు ఎయిర్‌ పోర్ట్‌లవద్దా, బోర్డర్స్‌ వద్దా పటిష్టమైన తనిఖీలు నిర్వహిస్తున్నామని రాయల్‌ ఒమాన్ పోలీస్‌ అధికారి ఒకరు చెప్పారు. ట్రాఫిక్‌ నిబంధనల ఉల్లంఘనలకు సంబంధించి అందరిలో అవగాహన కల్పిస్తున్నా, కొందరు వాటిని లైట్‌గా తీసుకుంటున్నారంటున్న ఆ అధికారి, ఆన్‌లైన్‌లో నిబంధనల ఉల్లంఘనకు సంబంధించిన సంపూర్ణ సమాచారం ఉందనీ, ఎవరైనా తాము నిబంధనలు ఉల్లంఘించామో లేదో తెలుసుకోడానికి ఆ వెబ్‌సైట్‌లోకి లాగిన్‌ అవ్వవచ్చని తెలిపారు. ఆన్‌ లైన్‌ ద్వారా ఫైన్‌ చెల్లించేస్తే, లీగల్‌ యాక్షన్స్‌కి అవకాశం ఉండదని రాయల్‌ ఒమాన్ పోలీసులు చెప్పారు. ఒకవేళ ఫైన్‌ చెల్లించనిపక్షంలో 24 నుంచి 48 గంటలపాటు జైలు శిక్ష తప్పదని సూచించారు పోలీసులు. ఒమాన్లో జరిగిన యాక్సిడెంట్స్‌లో 816 మంది చనిపోతే, అందులో 281 మంది విదేశీయులు కాగా, 535 మంది ఒమానియన్స్‌. రోడ్డు ప్రమాదాల్ని తగ్గించడంలో భాగంగానే నిబంధనల్ని కఠినతరం చేసినట్లు రాయల్‌ ఒమాన్ పోలీసులు చెప్పారు.

--నూనె లెనిన్ కుమార్(ఒమాన్)