పేదల ఆకలి తీర్చేందుకు కొచ్చిలో నూతనంగా ప్రారంభించిన ఓ రెస్టారెంట్‌ యాజమాన్యం వినూత్న ప్రయత్నం చేసింది. 'పాప్పడవడ' అనే రెస్టారెంట్‌ యాజమాన్యం 420 లీటర్ల సామర్థ్యంగల సామాజిక రిఫ్రిజిరేటర్‌(ఫ్రీజ్‌)ను కొచ్చి పట్టణంలోని కాలూర్‌ బస్టాండులో ఏర్పాటుచేసింది. ఇందులో పాప్పడవడ రెస్టారెంట్‌ యాజమాన్యం ప్రతిరోజూ 50 ఆహార పొట్లాలను ఉంచుతుంది. అవసరమైన వారు వాటిని తీసుకొని ఆరగించవచ్చు. అంతేగాక ఆహారం మిగిలితే ఎవరైనా అందులో ఉంచవచ్చు.ఈ రిఫ్రిజిరేటర్‌ భద్రత కోసం సీసీ టీవీని కూడా ఏర్పాటు చేస్తున్నట్లు పాప్పడవడ రెస్టారెంట్‌ యజమాని మిను పాలిన్‌ పేర్కొన్నారు. రిఫ్రిజిరేటర్‌ కయ్యే విద్యుత్తు ఖర్చును తామే భరించనున్నట్లు తెలిపారు. ఇందులో ఆహారాన్ని ఉంచాలని విజ్ఞప్తి చేశారు.