ఇటీవలే నాని ‘దసరా’ సినిమాతో తిరుగులేని హిట్టు కొట్టి జోష్ మీదున్నాడు. ‘దసరా’ టైమ్‌లోనే తన 30 వ సినిమాని అనౌన్స్ చేసి ఫ్యాన్స్‌నీ హుషారెత్తించాడు నాని.

ఆ సినిమాకి సంబంధించిన కాన్సెప్ట్ వీడియో కూడా రిలీజ్ చేసి, రాబోయే ఆ ప్రాజెక్ట్‌పై క్యూరియాసిటీ క్రియేట్ చేశాడు నాని. తండ్రీ కూతుళ్ల నేపథ్యంలో ఈ సినిమా కథ వుండబోతోందనీ కాన్సెప్ట్ పోస్టర్ ద్వారా అర్ధమైంది.

గతంలో ‘జెర్సీ’ కోసం నాని తండ్రి పాత్రలో నటించిన సంగతి తెలిసిందే. తండ్రీ కొడుకుల మధ్య సెంటిమెంట్ ఆ సినిమాలో బాగా వర్కవుట్ అవ్వడమే కాదు, నానికి కూడా మంచి పేరు తీసుకొచ్చింది ఆ సినిమా.

ఆ మ్యాజిక్ ఈ సారి కూడా రిపీట్ అవుతుందేమో చూడాలి మరి. ఇకపోతే, ఈ సినిమాకి ‘హలో నాన్న’ అనే టైటిల్ ప్రచారంలో వుంది. విడాకులు తీసుకున్న తల్లితండ్రులిద్దరి మధ్య నలిగిపోయే చిన్నారి కథనే ‘హలో నాన్న’ అంటున్నారు. మృణాల్ ఠాకూర్ ఈ సినిమాలో హీరోయిన్‌గా నటిస్తోంది.