సూపర్‌స్టార్‌ రజనీకాంత్‌ హీరోగా రూపుదిద్దుకుంటున్న 'కబాలి' చిత్రం విడుదలకు ముందే రికార్డు సృష్టించింది. గతేడాది జులై 10న విడుదలై ప్రపంచ వ్యాప్తంగా సంచలన విజయం సాధించిన 'బాహుబలి' చిత్రం ట్రైలర్‌ హిట్స్‌ను కబాలి టీజర్‌ అధిగమించింది. 2015 జూన్‌ 1న యూట్యూబ్‌లో విడుదలైన 'బాహుబలి' తెలుగు ట్రైలర్‌ వ్యూస్‌ను 2016 ఏప్రిల్‌ 30న విడుదలైన 'కబాలి' టీజర్‌ దాటింది. బాహుబలి ట్రైలర్‌ విడుదలై ఏడాది దాటగా... ఇప్పటి వరకు దాన్ని మొత్తం 1.30 కోట్ల మందికిపైగా చూశారు. కానీ కబాలి తమిళ టీజర్‌ విడుదలై పది రోజులు కాకముందే 1.58 కోట్ల మందికిపైగా వీక్షించారు.

తనదైన స్టైల్‌తో డైలాగ్‌లు విసురుతూ టీజర్‌తోనే ఇంతగా ఆకట్టుకున్న తలైవా మరి ట్రైలర్‌, సినిమాతో ప్రేక్షకులను ఇంకెంతగా అలరించనున్నారో వేచి చూడాలి. ఈ చిత్రంలో రజనీకాంత్‌కి జతగా రాధికా ఆప్టే నటించారు. పా రంజిత్‌ దర్శకత్వం వహించిన ఈ చిత్రాన్ని కలైపులి ఎస్‌ థాను నిర్మిస్తున్నారు.