ఏ తెలుగు ప్రేక్షకుడు ఊహకీ అందకుండా కళ్యాణ్ రామ్‌తో సినిమా కన్ఫర్మ్ చేసి అందరినీ కళ్ళప్పగించేలా చేశారు పూరి జగన్నాధ్. ఈ మధ్యనే పూజా కార్యక్రమాలతో మొదలైన ఈ సినిమా రెగ్యలుర్ షూటింగ్ మే 25 నుండి జరుగనుంది. జర్నలిస్ట్ పాత్రలో కళ్యాణ్ రామ్ కనపడనున్నట్టు సమాచారం. ఇప్పటికే ఆయన పాత్రకి సంబంధించి ఓ స్టైలిష్ లుక్‌ని సిద్ధం చేయించారట పూరి. ఈ సినిమా తొలి షెడ్యూల్ మే 25 నుండి వారం రోజుల పాటు హైదరాబాద్‌లో, తర్వాత షెడ్యూల్ స్పెయిన్‌లో నెల రోజుల పాటు జరుగనుందని సమాచారం. నందమూరి ఆర్ట్స్ బ్యానర్‌లో కళ్యాణ్ రామ్ నిర్మించినున్న ఈ సినిమాతో అదితి ఆర్య హీరోయిన్‌గా పరిచయమవనుంది. 'టెంపర్‌'తో యంగ్ టైగర్‌కి అదిరిపోయే హిట్టిచ్చిన ఈ డాషింగ్ డైరక్టర్ కళ్యాణ్ రామ్‌కి ఏ స్థాయి విజయాన్నిస్తారో మరి..!