చాలామందికి ఈ సమస్య చాలా బాధిస్తుంది. రాత్రంతా నిద్ర పట్టక, మెళకువగానే ఉన్నట్టు అనిపిస్తుంటుంది. దాంతో రోజంతా అలసట, బద్దకం, రకరకాల సమస్యలు తలెత్తుతాయి. ఈ నిద్రలేమితో అలసటలాంటి సమస్యలే కాదు. మతిమరుపు, ఏకాగ్రత తగ్గటం, మధుమేహం, నీరసం, నరాల బలహీనతలాంటి పెద్ద సమస్యల ముప్పు కూడా పొంచి ఉంది. అయితే ఇది దీర్ఘకాల సమస్యగా ఉంటే, వైద్యుల వద్దకు వెళితే తాత్కాలికంగా ఉపశమనాన్నిచ్చే నిద్ర మాత్రల వంటివి సిఫారసు చేస్తారు. అయితే వీటితో ఈ సమస్య తాత్కాలికంగా తగ్గినట్లనిపించినా, వీటికి అలవాటు పడడం వల్ల శరీరానికి ఇతర దుష్ప్రభావాలు కలిగే అవకాశం కూడా లేకపోలేదు. అందుకే ఈ నిద్రలేమిని ఎదుర్కోవడానికి కొందరు అమెరికన్‌ వైద్య నిపుణులు ఒక కొత్త రకమైన చికిత్సను వెలుగులోకి తీసుకువచ్చారు. ఆ చికిత్స పేరే ‘కాగ్నెటివ్‌ బిహేవియర్‌ థెరఫీ’. దీంతో మంచి ఫలితం కనబడుతోందని పరిశోధకులు చెప్తున్నారు. అసలు ఈ థెరఫీ ఏంటి అంటే అనుభవజ్ఞులైన ప్రత్యేక వైద్యుల పర్యవేక్షణలో ఈ సమస్యతో బాధపడేవారికి ప్రత్యేకంగా కొంత కౌన్సిలింగ్‌ ఇస్తారట. దాంతో మన ఆలోచనా సరళిలోనూ, ప్రవర్తనలోనూ కొన్ని రకాల మార్పులు చోటు చేసుకునేలా చేయడం జరుగుతుందట. దాంతో ఆయ పరిస్థితులకు అనుగుణంగా మన మెదడు స్పందించేలా నిపుణులు కౌన్సిలింగ్‌ నేర్పిస్తారట. దాంతో ప్రతిరోజూ నిద్రపోయే కన్నా 20 నిముషాలు ముందుగానే నిద్రకి ఉపక్రమించడమే కాకుండా ఇంకొక 20 నిముషాలు ఎక్కువగా కూడా నిద్రపట్టే అవకాశం ఉంటుందట. ఈ చికిత్స ద్వారా నిద్రలేవగానే ఎంతో హాయిగా ఉండి, రోజూ ఒకే సమయానికి నిద్రపోవడం, చెడు ఆలోచనలు, ఆందోళనలు తగ్గి, మనసుకు మంచి విశ్రాంతి కూడా లభిస్తున్నాయని ఆస్ట్రేలియాకు చెందిన వైద్య నిపుణులు వివరించడం జరిగింది.