రియాద్: సౌదీ అరేబియాలోని ఉరుక్ బని మారిడ్ రిజర్వ్ ప్రతిష్టాత్మక యునెస్కో ప్రపంచ వారసత్వ జాబితాలో తన స్థానాన్ని పొందింది. ఈ విషయాన్ని సాంస్కృతిక శాఖ మంత్రి, నేషనల్ కమీషన్ ఫర్ ఎడ్యుకేషన్, కల్చర్ అండ్ సైన్స్ చైర్మన్ మరియు హెరిటేజ్ కమిషన్ చైర్మన్ ప్రిన్స్ బదర్ బిన్ అబ్దుల్లా బిన్ ఫర్హాన్ ప్రకటించారు. సెప్టెంబర్ 10 నుండి 25 వరకు రియాద్‌లో జరుగుతున్న యునెస్కో వరల్డ్ హెరిటేజ్ కమిటీ యొక్క పొడిగించిన 45వ సెషన్‌లో ఈ మేరకు నిర్ణయించారు.  విభిన్న ప్రాంతాలలో స్పష్టంగా కనిపించే దాని సంస్కృతి, జీవవైవిధ్యాన్ని పరిరక్షించడంలో రాజ్యం యొక్క స్థిరమైన నిబద్ధతకు ఈ విజయం నిదర్శనమని ఆయన చెప్పారు. 

అర్-రుబ్ అల్-ఖాలీ (ది ఎంప్టీ క్వార్టర్) పశ్చిమ అంచున ఉన్న ఉరుక్ బని మారిడ్ రిజర్వ్ 12,750 కిమీ² కంటే ఎక్కువ విస్తీర్ణంలో ఉంది. ఇది ఉష్ణమండల ఆసియాలో ఏకైక ఇసుక ఎడారిగా..  భూమిపై అతిపెద్ద నిరంతర ఇసుక సముద్రంగా గుర్తింపు పొందింది. ఈ రిజర్వ్ సౌదీ అరేబియాలోని వృక్షజాలం, జంతుజాలం యొక్క పర్యావరణ, జీవ పరిణామానికి అసాధారణమైన సాక్ష్యంగా నిలుస్తుంది. ఇది 120 కంటే ఎక్కువ దేశీయ వృక్ష జాతుల మనుగడకు కీలకమైన సహజ ఆవాసాలను అందిస్తుంది. అరేబియన్ ఒరిక్స్ సహా అంతరించిపోతున్న జంతువులకు ఈ రిజర్వ్ ఆశ్రయం కల్పిస్తుంది.