కువైట్: భారతదేశంలో పనిచేస్తున్న ప్రధాన విమానయాన సంస్థలలో బ్యాగేజీ నిర్వహణ విధానాలను క్రమబద్ధీకరించడానికి భారతదేశపు పౌర విమానయాన భద్రత బ్యూరో (BCAS) కీల‌క ఆదేశాలు జారీ చేసింది. బ్యాగేజీని సకాలంలో అందజేయడానికి అవసరమైన చర్యలను అమలు చేయాలని కోరుతూ విమాన‌యాన సంస్థ‌ల‌కు లేఖలు రాసింది.  BCAS ఇండియాలోని ఆరు ప్రధాన విమానాశ్రయాలలో విస్తృతమైన సర్వేను నిర్వహించింది. ఈ సంద‌ర్భంగా ఏడు విమానయాన సంస్థల కార్యకలాపాలను క్షుణ్ణంగా పరిశీలించింది.  వాటి బ్యాగేజీ డెలివరీ ప్రక్రియలతో పాటు 3600 విమానాల కదలికలను విశ్లేషించింది. నిబంధనల ప్రకారం.. విమానం ఇంజన్ షట్‌డౌన్ అయిన తర్వాత 10 నుండి 30 నిమిషాల వ్యవధిలో ప్రయాణీకుల సామాను డెలివరీ అయ్యేలా ఎయిర్‌లైన్స్ చ‌ర్య‌లు చేప‌ట్టాల్సి ఉంటుంది.  కాగా, ఏ ఎయిర్‌లైన్స్ కూడా నిర్దేశించిన ప్రమాణాలను  అందుకోలేద‌ని నిర్ధారించారు. ఇంజిన్ షట్‌డౌన్ అయిన 10 నిమిషాలలోపు మొదటి సామాను కన్వేయర్ బెల్ట్‌కు చేరుకోవాలని లేఖ‌లో సూచించారు.  ఫిబ్రవరి 26 తేదీలోపు అవసరమైన చర్యలను అమలు చేయడానికి ఎయిర్‌లైన్స్‌కు BCAS 10 రోజుల గడువు విధించింది.