దోహా: ఖతార్ కోల్డ్ వెదర్ ఉన్నందున ప్రజలు ఆరోగ్యంగా.. సురక్షితంగా ఉండటానికి తగిన చర్యలు తీసుకోవాలని ప్రాథమిక ఆరోగ్య సంరక్షణ సంస్థ (PHCC) సూచించింది. ఉష్ణోగ్రతలలో హెచ్చుతగ్గుల కారణంగా తలెత్తే ఆరోగ్య ప్రమాదాలను నివారించడానికి ముందు జాగ్రత్త చర్యలు తీసుకోవాలని కోరింది. అదే సమయంలో ఫ్లూ వ్యాక్సిన్ పొందిన వారు కాలానుగుణ ఫ్లూ నుండి మెరుగైన రక్షణ పొందుతారని చెప్పారు. వాతావరణ శాఖ ప్రకారం.. అబు సమ్రాలో ఉష్ణోగ్రతలు కనిష్టంగా 5 ° C నుండి గరిష్టంగా 19 ° C వరకు, దోహాలో కనిష్టంగా 13 ° C - గరిష్టంగా 20 ° C వరకు నమోదయ్యాయి. అబు సమ్రాలో కనిష్టంగా 4°C నుండి గరిష్ఠంగా 20°C వరకు ఉష్ణోగ్రతలు నమోదవుతాయని తెలిపింది. ముఖ్యంగా రాత్రి సమయంలో ఉష్ణోగ్రతలు దారుణంగా పడిపోతున్నట్లు హెచ్చరించింది.  కనీసం 20 సెకన్ల పాటు సబ్బు, వెచ్చని నీటితో చేతులు కడుక్కోవాలని సూచించింది.  ఫ్లూ వ్యాక్సిన్‌ను పొందడానికి ప్రజలు తమ ఆరోగ్య కేంద్రాలను సందర్శించాలని PHCC కోరింది. చలికాలంలో చర్మ సంరక్షణ కోసం, పొడి చర్మాన్ని నివారించడానికి మాయిశ్చరైజర్‌ని ఉపయోగించాలని,  చర్మం దెబ్బతినకుండా ఉండటానికి సన్‌స్క్రీన్‌ని అప్లై చేయాలని PHCC తెలిపింది. అదే సమయంలో చలికుంపటి పొగకు దూరంగా ఉండాలని సూచించింది. ఒకవేళ వాటిని ఉపయోగిస్తే సరైన వెంటిలేషన్‌ను ఏర్పాటు చేసుకోవాలని కోరింది. ముఖ్యంగా పిల్లలు, వృద్ధులు పొగకు దూరంగా ఉండాలని సూచించింది. చల్లనిగాలి నుండి రక్షణకు కిటికీలను మూసివేయాలని, వెచ్చని దుస్తులను వేసుకోవాలని సూచించింది. అల్లం టీ, చమోమిలే టీ లేదా పిప్పరమెంటు టీ వంటి వెచ్చని పానీయాలు తాగాలని, కూరగాయలు లేదా చికెన్ సూప్ వంటి ఆరోగ్యకరమైన సూప్‌లను తీసుకోవాలని PHCC తన సలహాలో సూచించింది.