పూరి జగన్నాథ్‌ సినిమాల్లో కథానాయకుడు పక్కా మాస్‌ అయి ఉంటాడు. అందుకు తగ్గట్టే ఆయన సినిమా పేర్లు కూడా ఉంటాయి. ఇడియట్‌, పోకిరి, లోఫర్‌ ఇలాంటి టైటిల్స్‌తోనే ఆయన విజయాలు అందుకున్నారు. ఇక ప్రతీసారి విభిన్నంగా ప్రేక్షకుల ముందుకు రావాలని తపించే నటుడు కల్యాణ్‌రామ్‌. ఇప్పుడు వీరిద్దరి కాంబినేషన్లో ఓ చిత్రం తెరకెక్కుతున్న సంగతి తెలిసిందే. రేపు కల్యాణ్‌రామ్‌ పుట్టిన రోజు సందర్భంగా సోమవారం ఈ చిత్రం ఫస్ట్‌లుక్‌ను విడుదల చేశారు. కల్యాణ్‌రామ్‌ తన ట్విట్టర్‌ ఖాతా ద్వారా ఈ విషయాన్ని తెలుపుతూ.. రెండు పోస్టర్లను అభిమానులతో పంచుకున్నారు. ఈ చిత్రానికి 'ఇజం' అనే టైటిల్‌ను ఖరారు చేశారు. 'ఈ వ్యక్తిని మీరు అరెస్టు చేయగలరు. కానీ అతడి ఐడియాలను అరెస్టు చేయలేరు. అతడు ప్రత్యేకం, చంపడానికి అతడి దగ్గర కథ ఉంది' అని ఈ రెండు పోస్టర్లపై రాసి ఉంది. ''ఇంతకీ ఈ 'ఇజం' అనే పదం ఎక్కడి నుంచీ పుట్టిందో తెలుసా.. కమ్యూనిజం, హీరోయిజం, జర్నలిజం, హ్యూమనిజం, రియలిజం ఇలాంటి పదాల్లోని చివరి అక్షరం అండి అది'అని పోస్టర్‌పై పేర్కొన్నారు. ఈ చిత్రంలో కల్యాణ్‌రామ్‌ జర్నలిస్టు పాత్రలో కనిపించనున్నట్లు సమాచారం.