అక్కినేని నాగార్జున ప్రధాన పాత్రలో కె. రాఘవేంద్రరావు దర్శకత్వంలో రూపుదిద్దుకుంటున్న చిత్రం 'ఓం నమో వేంకటేశాయ'. ఈ చిత్రంలో అనుష్క భక్తురాలి పాత్రలో నటిస్తున్నట్లు దర్శకేంద్రుడు సోషల్‌మీడియా ద్వారా తెలిపారు. 'ఏ పాత్ర అయినా చేయగలిగే అద్భుతమైన నటులలో అనుష్క ఒకరు. అది అరుంధతి అయినా, బాహుబలి అయినా, రుద్రమదేవి అయినా.. తన పాత్రలకు తగ్గట్లు ఒదిగిపోతూ నటనతో అందరిని ఆశ్చర్య పరుస్తూనే ఉంది. ఎప్పటి నుంచో తనకి నా సినిమాలో తగిన పాత్ర వస్తే చేయాలని ఉంది. ఇన్నాళ్లకి 'ఓం నమో వేంకటేశాయ' ద్వారా అది జరిగింది. తన కెరీర్‌లో మొదటిసారి భక్తురాలి పాత్ర చేస్తుంది. ఆ రోల్‌లో తన అద్భుత నటన చూస్తుంటే చాలా ఆనందంగా ఉంది, కొత్తగా కన్పిస్తుంది. 'ఓం నమో వేంకటేశాయ'లో అనుష్క నాగార్జునకి జంటగా నటించడం లేదు'. అని రాఘవేంద్రరావు తన ఫేస్‌బుక్‌ ఖాతాలో పోస్ట్‌ చేశారు. ఈ చిత్రానికి కీరవాణి సంగీతం సమకూరుస్తున్నారు.