తమిళనాడుకి చెందిన నారాయణన్‌ ముత్తయ్య అనే వ్యక్తి బహ్రెయిన్‌లో ఇటీవల హత్యకు గురయ్యాడు. ఆ హత్యకు కారణం ఇంతవరకు తెలియరాలేదు. డబ్బు కోసమే హత్య జరిగిందనీ ముందుగా అంతా భావించారు. అయితే హత్యకు గురైన వ్యక్తి నుంచి దుండగుడు డబ్బునుగానీ, మొబైల్‌ ఫోన్‌గానీ, ఆభరణాలుగానీ తీసుకెళ్ళిపోకపోవడంతో అది డబ్బు కోసం జరిగిన హత్య కాదని పోలీసులు ప్రాథమిక నిర్ధారణకు వచ్చారు. ప్రత్యక్ష సాక్షి కథనం ప్రకారం మత్తయ్యను హత్య చేసింది ఆసియాకి చెందిన వ్యక్తేనని పోలీసులు వెల్లడించారు. తమిళనాడులోని పుదుకొట్టై జిల్లా అనంతగిరికి చెందిన మత్తయ్య 10 ఏళ్ళుగా బహ్రెయిన్‌లో నివాసం ఉంటున్నాడు. మనామాలోని యతీమ్‌ ఎయిర్‌ కండిషనింగ్‌ కంపెనీలో ఫ్యాబ్రికేటర్‌గా పనిచేస్తున్నాడు మత్తయ్య. మృదుస్వభావి అనీ, చాలా మంచివాడని మత్తయ్య గురించి సన్నిహితులు చెప్పారు. పోలీసు విచారణ పూర్తయ్యాక మత్తయ్య మృతదేహాన్ని స్వదేశానికి తరలించేందుకు కంపెనీ ప్రయత్నాలు చేస్తోంది.