రియాద్: సౌదీ అరేబియాలోని చిన్న గ్రాసరి దుకాణాలు (బకాలాస్) ఇక పై పొగాకు ఉత్పత్తులు, ఖర్జూరాలు, మాంసం, పండ్లు, కూరగాయలు వంటి వస్తువులను విక్రయించలేవని సౌదీ మునిసిపల్, గ్రామీణ వ్యవహారాలు మరియు గృహాల మంత్రిత్వ శాఖ ప్రకటించింది.

ఈ నిర్ణయాన్ని మంత్రి మాజిద్ అల్-హుగైల్ తీసుకున్నారు.దీని లక్ష్యం దేశవ్యాప్తంగా రిటైల్ రంగాన్ని పునఃవ్యవస్థీకరించి ప్రజారోగ్యం, భద్రతా ప్రమాణాలను మెరుగుపరచడమే.కొత్త నిబంధనలు తక్షణమే అమల్లోకి వస్తున్నా, ప్రస్తుత గిరాకీ దుకాణాలకు ఆరు నెలల గడువు మంజూరు చేశారు.

నిషేధిత ఉత్పత్తులు:

• ఈ నూతన నిబంధనల ప్రకారం, చిన్న గ్రాసరి షాపులు, కియాస్కులు, మినీ మార్కెట్లు ఇకపై ఈ కింది వస్తువులను అమ్మకూడదు:
• పొగాకు ఉత్పత్తులు (సిగరెట్లు, ఈ-సిగరెట్లు, షీషా)
• ఖర్జూరాలు
• మాంసం
• పండ్లు మరియు కూరగాయలు

ఎక్కడ విక్రయించవచ్చో:

• ఈ ఉత్పత్తులను విక్రయించడానికి కేవలం ఈ సంస్థలకే అనుమతి ఉంటుంది.
• సూపర్ మార్కెట్లు – వీటికి మాంసం విక్రయానికి ప్రత్యేక లైసెన్స్ ఉండాలి.
• హైపర్ మార్కెట్లు – అన్ని నిషేధిత ఉత్పత్తులను ఏ ప్రత్యేక లైసెన్స్ అవసరం లేకుండా విక్రయించవచ్చు.
• కరెంట్ చార్జర్ కేబుల్‌లు, ప్రీ పెయిడ్ రీచార్జ్ కార్డులను మాత్రం అన్ని రకాల రిటైల్ షాపుల్లో అమ్మవచ్చు.

విస్తీర్ణ ప్రమాణాలు:

• కొత్త నిబంధనల ప్రకారం, రిటైల్ విభాగాల కనీస స్థల పరిమితులు ఇలా నిర్ణయించారు.
• గ్రాసరి దుకాణాలు – కనీసం 24 చదరపు మీటర్లు
• సూపర్ మార్కెట్లు – కనీసం 100 చదరపు మీటర్లు
• హైపర్ మార్కెట్లు – కనీసం 500 చదరపు మీటర్లు

వ్యాపారుల పై ప్రభావం:

• ఈ నిర్ణయం వేల సంఖ్యలో చిన్న గ్రాసరి షాపులపై ప్రభావం చూపనుంది. ముఖ్యంగా ఖర్జూరాలు, కూరగాయలు, పొగాకు ఉత్పత్తులపై ఆధారపడే చిన్న వ్యాపారాలు తమ వ్యాపార నమూనాను మార్చుకోవాల్సి ఉంటుంది.
• వారు ఈ నిషేధిత వస్తువుల అమ్మకాన్ని కొనసాగించాలని అనుకుంటే, తమ దుకాణ విస్తీర్ణాన్ని పెంచి సూపర్ మార్కెట్ లేదా హైపర్ మార్కెట్‌గా అప్‌గ్రేడ్ చేసుకోవాలి.

వినియోగదారులకు మార్పు:
ఈ మార్పులతో కాలనీల్లో చిన్న షాపుల నుంచి తక్షణ అవసరాల కొనుగోళ్లు తగ్గుతాయని భావిస్తున్నారు. అయితే, పెద్ద స్థాయి షాపులలో భద్రతా ప్రమాణాలు మెరుగవుతాయని ప్రభుత్వ అధికారులు పేర్కొన్నారు.

గడువు అనంతరం కఠిన చర్యలు:
ఈ ఆరు నెలల అనుసరణ గడువు తరువాత, నియమాలు పాటించని దుకాణాలపై జరిమానాలు, షాపు మూసివేత వంటి చర్యలు తీసుకుంటామని మంత్రిత్వ శాఖ స్పష్టం చేసింది.

సౌదీ అరేబియాలో కొత్త రిటైల్ మార్గదర్శకాలు ప్రజారోగ్యానికి మద్దతు, చిన్న వ్యాపారులకు సవాలుగా మారనున్నాయి.