సోచీ వింటర్‌ ఒలింపిక్స్‌లో వచ్చిన ఆరోపణలపై వచ్చే వారం విడుదలయ్యే కీలక నివేదికలో రష్యా దోషిగా తేలితే ఆ జట్టును రియోకు అనుమతించకూడదనే డిమాండ్‌ను పలు యాంటీ డోపింగ్‌ ఏజన్సీలు చేస్తున్నాయి. వీటిలో అమెరికా, కెనడా వంటి అగ్రరాజ్యాలకు చెందిన ఏజన్సీలు కూడా ఉండటం విశేషం. అవి తమ అభిప్రాయాన్ని శనివారం తెలిపాయి. శనివారం అంతర్జాతీయ ఒలింపిక్‌ కమిటీ సిద్ధం చేసిన ఓ పత్రం బయటకు పొక్కడంతో ఈ విషయం వెల్లడైంది. దీంతోపాటు అమెరికాకు చెందిన యాంటీ డోపింగ్‌ ఏజన్సీ యూఎస్‌ఏడీఏ సీఈవో ట్రావీస్‌ ట్రైగ్రెట్‌ కూడా రష్యా జట్టును ఒలింపిక్స్‌ నుంచి పూర్తిగా నిషేధించాలని డిమాండ్‌ చేశారు. దీనికి కెనడా కూడా మద్దతు తెలిపింది.
కెనడియన్‌ సెంటర్‌ ఫర్‌ ఎథిక్స్‌ ఇన్‌ స్పోర్ట్స్‌ (సీసీఈఎస్‌) సీఈఓ పాల్‌ మెలియా మాట్లాడుతూ ఐవోసీ ఒలింపిక్స్‌ నియమనిబంధనలను అమలు చేయడంలో ఆదర్శంగా ఉంటుందని నమ్ముతున్నామన్నారు. నిబంధనలను పరిశీలించి 2016 రియో ఒలింపిక్‌ క్రీడలలో పాల్గొనకుండా రష్యాను నిషేధించాలని కోరారు. ఇప్పటికే రష్యాకు చెందిన ట్రాక్‌ అండ్‌ఫీల్డ్‌ అథ్లెటిక్స్‌ విభాగం ఒలింపిక్స్‌లో పాల్గొనకుండా ఐఏఏఎఫ్‌ నిషేధించింది.