సూపర్‌స్టార్‌ రజనీకాంత్‌ 'కబాలి' చిత్రం విడుదలకు ముందే రోజుకో విశేషంతో వార్తల్లో నిలుస్తోంది. ఎయిర్‌ ఏషియా స్పెషల్‌ ప్యాకేజ్‌, కబాలి యాప్‌, కబాలి ఇమోజీ, వెండి నాణెలు ఇలా పలు విధాలుగా రజనీకాంత్‌ తన సూపర్‌స్టార్‌ ఇమేజ్‌ను చాటుకున్నారు. జులై 22 ప్రపంచ వ్యాప్తంగా విడుదల చేస్తున్న ఈ చిత్రాన్ని అమెరికాలో 400 స్క్రీన్లపై విడుదల చేస్తున్న సంగతి తెలిసిందే. అయితే అక్కడ ముందస్తు బుకింగ్‌లో ఈ చిత్రం టికెట్లు కేవలం రెండు గంటల్లోనే అయిపోయినట్లు సమాచారం. ఇది ఆశ్చర్యాన్ని కల్గిస్తున్నా.. నమ్మక తప్పని సత్యం అంటున్నారు సినీ వర్గాలు. అంతే మరి.. రజనీకాంత్‌ చిత్రానికి భారతదేశంలోనే కాదు అమెరికాలోనూ చాలా డిమాండ్‌ ఉందని ఈ విషయంతో స్పష్టమవుతోంది. మరి విడుదల తర్వాత 'కబాలి' ఎన్ని రికార్డులు సృష్టిస్తాడో చూడాలి.
పా రంజిత్‌ దర్శకత్వం వహిస్తున్న ఈ చిత్రానికి కలైపులి ఎస్‌ థను నిర్మాతగా వ్యవహరిస్తున్నారు. సంతోష్‌ నారాయణన్‌ చిత్రానికి సంగీతం సమకూరుస్తున్నారు. ఈ చిత్రంలో రజినీకాంత్‌ సరసన రాధికా ఆప్టే నటించారు.