ఒలింపిక్స్ లో పాల్గొనాలని బ్రెజిల్ వచ్చిన ఆస్ట్రేలియా ఒలింపిక్ బృందానికి ఓ ముప్పు తప్పింది. ఆసీస్ బృందం బసచేసిన బిల్డింగ్ లో అగ్నిప్రమాదం చోటుచేసుకోగా సిబ్బంది వారిని వెంటనే అక్కడి నుంచి తరలించింది. గ్రౌండ్ ఫ్లోరులో మంటలు ఆకస్మికంగా రావడంతో తమ బృందం కాస్త ఇబ్బంది పడిందని ఆసీస్ అధికార ప్రతినిధి మైక్ టాన్సర్డ్ తెలిపారు. 100 మంది అథ్లెట్లు సహా అధికారులు అక్కడ బస చేసినట్లు తెలిపారు.ఆటగాళ్ల కోసం మొత్తం 31 భవనాలలో ఏర్పాట్లు చేయగా, ఆసీస్ బృందం ఉన్న ప్రాంతంలో అగ్నిప్రమాదం చోటుచేసుకుంది. దట్టమైన పొగలు వ్యాపించడంతో స్థానిక సిబ్బంది వెంటనే స్పందించి మంటలను ఆర్పివేసిందని టాన్సర్డ్ వెల్లడించారు. రియో గేమ్స్ కు సమయం దగ్గర పడుతున్నా ఒలింపిక్ విలేజ్ లో వసతుల ఏర్పాట్లు పూర్తికాలేదని, వసతులు అస్తవ్యస్తంగా ఉన్నాయని ఓ వైపు ఆస్ట్రేలియా ప్రతినిధి కిట్టీ చిల్లర్ ఫిర్యాదు చేసిన విషయం తెలిసిందే