న్యూఢిల్లీ: ఆంధ్రప్రదేశ్ రాష్ట్రంలోని రైతు ఉత్పత్తిదారుల సంస్థల (FPOs) పనితీరు పై లోక్‌సభలో చర్చ జరిగింది. ఈ సందర్భంగా ఎంపీ బాలశౌరి ప్రశ్నలు అడగగా, కేంద్ర వ్యవసాయ మరియు రైతు సంక్షేమ శాఖ సహాయ మంత్రి భగీరథ చౌదరి వ్రాతపూర్వక సమాధానం సమర్పించారు.

కేంద్ర ప్రభుత్వం అమలు చేస్తున్న ‘10,000 FPOల ఏర్పాటు మరియు ప్రోత్సాహం’ పథకం కింద ఆంధ్రప్రదేశ్‌లో ఇప్పటివరకు 716 FPOలు ఏర్పాటు చేసి నమోదు చేసినట్లు మంత్రి తెలిపారు. ఈ సంస్థలలో మొత్తం 6,32,891 మంది రైతులు వాటాదారులుగా చేరి ఉన్నారని వెల్లడించారు. రాష్ట్రంలోని FPOలు కలిపి రూ. 73,543.73 కోట్ల వ్యాపార లావాదేవీలు నిర్వహించడం గమనార్హమని పేర్కొన్నారు.

వ్యవసాయ అవసరాల సరఫరాలో కూడా FPOలు కీలక పాత్ర పోషిస్తున్నాయి. రాష్ట్రంలో 387 FPOలు ఎరువుల లైసెన్సులు, 201 FPOలు విత్తనాల లైసెన్సులు, 198 FPOలు పురుగుమందుల లైసెన్సులు పొందినట్లు మంత్రి వివరించారు. అంతేకాకుండా, డిజిటల్ మార్కెటింగ్‌ను ప్రోత్సహించేందుకు 356 FPOలు ‘ఓపెన్ నెట్‌వర్క్ ఫర్ డిజిటల్ కామర్స్’ (ONDC) వేదికపై నమోదు అయ్యాయి.

ఈ FPOల ద్వారా వరి, వేరుశనగ, పత్తి, చెరకు, మొక్కజొన్న, కందులు, పసుపు, నువ్వులు, సుగంధ ద్రవ్యాలు, టమాటా, చిరుధాన్యాలు, బెల్లం, మామిడి, అరటి, కొబ్బరి వంటి పంటలు ప్రధానంగా ప్రోత్సహించబడుతున్నాయి.

ఇక ఈక్విటీ గ్రాంట్ విషయానికి వస్తే, రాష్ట్రంలోని 716 FPOలలో 327 సంస్థలు ఇప్పటికే ఈ గ్రాంట్‌ను పొందాయని మంత్రి తెలిపారు. మిగిలిన సంస్థలు వాటాదారుల సమీకరణ, మూలధన సేకరణ, డాక్యుమెంటేషన్, ఆన్‌లైన్ దరఖాస్తు వంటి దశల్లో ఉన్నాయని చెప్పారు.

ఈక్విటీ గ్రాంట్ ద్వారా FPOల ఆర్థిక స్థిరత్వం పెరగడం, రుణాలు పొందే సామర్థ్యం మెరుగుపడడం, సభ్యుల భాగస్వామ్యం పెరగడం వంటి ప్రయోజనాలు కలుగుతాయని ఆయన పేర్కొన్నారు.

ఇంకా ఎక్కువ FPOలు ఈ గ్రాంట్‌ను పొందేందుకు అవగాహన కార్యక్రమాలు, సామర్థ్యాభివృద్ధి, నిరంతర పర్యవేక్షణ, అమలు సంస్థలు మరియు క్లస్టర్ ఆధారిత వ్యాపార సంస్థల ద్వారా సహాయం అందిస్తున్నట్లు మంత్రి వివరించారు.

రాష్ట్రంలో రైతుల సంఘటిత శక్తిని పెంపొందించడంలో FPOలు ముఖ్య పాత్ర పోషిస్తున్నాయని ఈ చర్చలో స్పష్టమైంది.