కువైట్: అల్-ఫర్వానియా మరియు అల్-జహ్రా ఆసుపత్రులను ఆరోగ్య శాఖ మంత్రి డాక్టర్ అహ్మద్ అల్-అవాధి,తనిఖీ చేశారు. నిరంతరాయ సేవలను అందించడానికి కువైట్ ఆరోగ్య వ్యవస్థ పూర్తిగా సిద్ధంగా ఉందని మరియు అధిక సామర్థ్యంతో పనిచేస్తోందని ఆయన వెల్లడించారు. పండుగ కాలంలో ఉన్నత-నాణ్యత గల ఆరోగ్య సంరక్షణ సేవలను కొనసాగించాలనే ఆరోగ్య మంత్రిత్వ శాఖ నిబద్ధతలో భాగంగా ఈ పర్యటనలు నిర్వహిచింనట్లు అధికారులు తెలిపారు. ఈ సందర్భంగా మంత్రి కీలక విభాగాల సంసిద్ధతను సమీక్షించారు. మెడిసిన్స్ మరియు వైద్య సామాగ్రి లభ్యతను అంచనా వేశారు. వైద్య, నర్సింగ్ సిబ్బందితో సమావేశమై వారి అంకితభావాన్ని ప్రశంసించారు. అత్యున్నత ప్రమాణాలతో సంరక్షణను కొనసాగించాలని వారిని కోరారు.

అల్-జహ్రా ఆసుపత్రిలో డాక్టర్ అల్-అవాధి వెంట ఔషధ నియంత్రణ సహాయ కార్యదర్శి డాక్టర్ అహ్మద్ అల్-సయీద్ కూడా ఉన్నారు. అక్కడ వారు ఔషధాల నిల్వల స్థాయిలను పరిశీలించి, సేవలు సజావుగా అందేలా చూసేందుకు సరఫరా వ్యవస్థలను పర్యవేక్షించారు.

మరోవైపు,  సీనియర్ ఆరోగ్య అధికారులు పలు కేంద్రాలలో విస్తృతమైన క్షేత్రస్థాయి తనిఖీలు నిర్వహించారు. ఆరోగ్య సేవల సహాయ కార్యదర్శి డాక్టర్ హిషాం కాలెందర్, ప్రత్యేక విభాగాల సంసిద్ధతను సమీక్షించేందుకు అల్-సబా ఆసుపత్రిని సందర్శించారు. అదే సమయంలో, ప్రజారోగ్య వ్యవహారాల సహాయ కార్యదర్శి డాక్టర్ అల్-ముంధిర్ అల్-హసావి, సేవల వ్యవహారాల సహాయ కార్యదర్శి ఇంజనీర్ అబ్దుల్ అజీజ్ అల్-తాషాతో కలిసి అల్-అదాన్ ఆసుపత్రిని తనిఖీ చేసి, మౌలిక సదుపాయాలు మరియు అత్యవసర ప్రతిస్పందన ప్రణాళికల సంసిద్ధతను ధృవీకరించారు.

సహాయక వైద్య సేవల సహాయ కార్యదర్శి డాక్టర్ అబ్దుల్లా అల్-ఫారెస్.. ఈద్ సందర్భంగా అత్యవసర పరిస్థితులను ఎదుర్కొనేందుకు ప్రతిస్పందన యంత్రాంగాలు మరియు కార్యాచరణ సంసిద్ధతను అంచనా వేస్తూ, అత్యవసర వైద్య సేవల విభాగం, కార్యకలాపాల కేంద్రం మరియు అంబులెన్స్ యూనిట్లలో పర్యటించారు.

ఇదిలా ఉండగా, ప్రైవేట్ వైద్య సేవలు మరియు పరిపాలనా వ్యవహారాల సహాయ కార్యదర్శి డాక్టర్ ఫాతిమా అల్-నజ్జర్.. అల్-సిద్దిఖ్‌లోని ముబారక్ అల్-హసావి ఆరోగ్య కేంద్రాన్ని మరియు అల్-అద్లియాలోని అల్-సాఖర్ ఆరోగ్య కేంద్రాన్ని సందర్శించి, సిబ్బంది మరియు అవసరమైన సామాగ్రి లభ్యతను సమీక్షించారు.

ఆరోగ్య సంరక్షణ వ్యవహారాల సహాయ అండర్ సెక్రటరీ డాక్టర్ నదియా అల్-జుమా.. ప్రాథమిక మరియు ప్రత్యేక సంరక్షణ సేవలను అందించడంలో సంసిద్ధతను అంచనా వేయడానికి జాబెర్ అల్-అలీ ఆరోగ్య కేంద్రం మరియు మనాహి అల్-ఒసైమీ ప్రత్యేక ఆరోగ్య కేంద్రాన్ని కూడా తనిఖీ చేశారు.

సంసిద్ధతను పెంపొందించడానికి మరియు దేశవ్యాప్తంగా ఆరోగ్య సంరక్షణ సేవల కొనసాగింపును నిర్ధారించడానికి చేపట్టిన తమ కొనసాగుతున్న వ్యూహంలో ఈ క్షేత్రస్థాయి పర్యటనలు ఒక భాగమని మంత్రిత్వ శాఖ తెలిపింది.